Tunlai Zaithiam ropuite tluk loh Mozart
Kum 2016 kha i thlir let chuan Rihanna album ‘Anti’ te, Lady Gaga album ‘Joanne’ te, David Bowie album ‘Blackstar’, Kanye West-a album ‘Life of Pablo’ te a chhuak. Macklemore & Ryan Lewis, Beyonce, Drake, an tam mai, zaithiam lar tam tak album a chhuak. Mahse heng zawng zawng hian nikum chhung khan an album, CD-a hralh tam lamah Mozart-a music an tihchhuah Mozart 225: The New Complete Edition hi an tluk lo.
Mozart-a music album an siam, nikuma an tihchhuah hi Billboard-in a chhinchhiah danin copy maktaduai 1.25 lai mai CD-in an hralh chhuak a, chutih rual chuan a album anga chhut chuan a tam vak lo thei. Mozart 225: The New Complete Edition-ah hian disc 200 a awm a, disc an hralh zawng zawng hi maktaduai 1.25 a ni a, heti a nih chuan a album pum tawp ang chuan copy 6,250 vel chauh tihna a ni thei.
Forbes-a ziah a nih dan chuan Mozart-a album Mozart 225: The New Complete Edition hi album hralh hnem ber a ni thei a, a ni lo thei bawk tih a ni. Drake-a ‘Views’ kha copy maktaduai 1.3 vel hralh a ni a, amaherawhchu CD ang chuan hralh a tam lo a, album equivalent lamah a sang viau. CD ang ngawr ngawr a nih chuan Mozart 225: The New Complete Edition hi an hralh hnem ber a, he album hi CD chauh (physical album chauh) a hralh a ni. Streaming ang zawng phei chuan Mozart-a album hi an hralh tam lo hle.