Notorius B.I.G. A thih thuah thuneitute tel ring

Rapper ropui Notorius B.I.G. thih thuah tunhnai khan a nu a ṭawng chhuak a, a fapa thah chung­changah Los Angeles-a thuneitute chu a phiarruknaah an tel ve nia a ngaih thu a sawi chhuak.

A hming tak Christopher Wallace, Notorious B.I.G. tia hriat lar hi kum 1997 March 9 khan Los Angeles-ah kahhlum a ni a, pawikhawihtu hi tun thlengin man chhuah a la ni lo.

Notorious B.I.G. nu, Voletta Wallace chuan a fapa thah thua thudik awmte LAPD ten an thup tlat niin a sawi a, a fapa thah thua a rinhlelh ber pawh LAPD te hian tunge a nih an hrechiang hle niin a sawi. “Investigation an ti vek tawh a, mahse kalpui zel an duh tawh si lo. Tualthahnaa inhnamhnawih an man duh lohna chhan ka hre lo,” a ti.

East Coast leh West Coast inepna
Notorious B.I.G. te, Tupac Shakur te hunlai hi rap khaw­velah, US-ah chuan East Coast leh West Coast inerna a nasat vanglai a ni awm e. Notorious B.I.G. hi East Coast lama an chhuanvawr leh hlawhtling a ni a, chutihlai chuan West Coast lamin rap khawvel an thunun a, East Coast lam nasa taka hma an sawn lai a ni. West Coast lama hriat hlawh chu Tupac Shakur a ni a, East leh West iner leh inbeih lai hi kum 1991 aṭanga kum 1997 inkar vel kha a ni ber.

Hip-Hop hi New York lam, East Coast lamah a hlawhtling hmasa a, hip-hop rawn lar tirh lama a hmunpui a ni. Kum 1980 chho, 1990 hma lam deuh hret aṭang khan West Coast lam an rawn lian chho a, a bul ṭantua ngaih fo chu Ice-T a ni a, a rap chu gangsta rap dik tak, hmasa ber nia ngaih a ni. Dr. Dre te an rawn lan chhoh a, Tupac Shakur te an rawn lan chhoh takah phei chuan West Coast chuan rap khawvel a thunun a, a chungnung ber a ni ta.

Hetianga West Coast an len a, an chungnun takah chuan record company lam thlengin an thunun titih ta mai. East Coast lam tan chuan recording deal hmuh a har bakah, an rapper-te record company-ten an hnar an hnar ta mai. Hemi duh loh avang hian Tim Dog chuan ‘F**k Compton’ a rawn tichhuak a, hetah hian Los Angeles lam rap a sawisel nasain, a bikin NWA a kâp nasa. He album hrim hrim hi West lam chhuak N.W.A. album hit, Straight Outta Compton nêk râna a hming hi phuah a ni. Hei bakah Eazy-E, Dr. Dre leh West Coast rapper dang tharum chhuahna hmanga vauna te a dah bawk. 

West Coast lamin an rawn do let nghal thuai a, Snoop Dogg pawh a rawn che na hle. Inepna a kal chho zel a, Puff Daddy chuan East Coast lam tan Bad Boy Records chu New York-ah a din a, Dr. Dre-a Death Row epna a ni. Silai chelek a ni chho a, Tupac Shakur kahhlum a ni a, Notorious B.I.G.pawh kahhlum a ni. Hetiang a nih takah chuan peace summit te buatsaih a ni a, East (US khaw­chhak lam) Coast leh West Coast (US khawthlang lam) inbeihna chuan reh lam a pan ta tial tial a ni.