White House-in Snoop Dogg a sawisel

Pathianni khan Snopp Dogg leh BADBADNOTGOOD te chuan ‘Lavendar’ remix music vi­deo an tichhuak a, hetah hian Donald Trump lem anga chei Clown chu Snoop Dogg hian silai lemin a kâp a, mi pakhat car-a a chuang lai chu police-in ti­dingin a kap bawk. He music video-a thil tihlante avangin White House chuan Snoop Dogg a sawisel nasa.

‘Lavendar’ music video chungchangah hian Donald Trump-a lawyer, Michael Cohen chuan Snoop Dogg chu, “Zahna chang hre rawh” a ti a, a video avang hian thupha a chawi ngei a ngai a ni a ti bawk. Cohen chuan, “Snoop hian president hnenah thupha chawi a ba a ni. Kha video, president thah tumna langah khan thil nuihzatthlak pakhat mah a awm lo a, mi ṭha tak anga ka lo ngaih laia khatiang music video a rawn tichhuak khan min ṭhâwng hle,” a ti.

‘Lavendar’ hla hi nikum July thlaa St. Anthony, Minnesota-a police-ten Philando Castile an kahhlum behchhana phuah chhuah a ni âwm e. Music video-ah hian Donald Trump chu Donald Klump tia tarlangin, ui zawng zawng hnawh chhuah a tum anga tarlan a ni.