'Hraileng Au Rawl' ah Emmanuel Lalchhanchhuaha a thiam ber

'Chhungkaw ṭha, Hnam lungphum' tih thupui hmanga buatsaih Hlachham/ Recitation inelna May 11 aṭanga ṭan chu June 3, Zirtawpni liam ta zanah khan zawhfel a ni ta a, Emmanuel Lalchhanchhuaha Class 6, Kids Care School, Ramhlun South chu pakhatna a ni.

Lawmman pakhatna latu Emmanuel Lalchhanchhuah hian tangkafai Rs 50,000 a dawng a, Pahnihna H.Lalrampuii, Class 5, Neuhof English Medium School chuan tangkafai Rs 30,000 dawngin Pathumna Lalremruati Ralte, Class 5, Home Missions School chuan Rs 20,000 a dawng thung. Top 10-a lang phak naupang dang pasarihte chuan consolation prize an dawng vek bawk.

Zonet leh Mizoram State Commission for Protection of Child Rights ṭangkawp buatsaih 'Hraileng Au Rawl' hi middle school chin hnuai lam zirlaite tana buatsaih a ni a, Grand Finale-ah hian Top 10 a inhlangkai naupang 10-te'n thupui mil Poetry an duh ber an chham a, endiktu pathum Dr. H.P. Lalropuia, Dr. H laldinmawia leh Dr Ramdinthari te chuan hemi zanah hian thutlukna an siam nghal a ni.

MSCPCR Chairman Dr. C Lalsangzuala chuan lawmthu sawiin Bible zirtirna aṭang pawhin naupangte chu humhalh leh venhim an ni a, chhungkua leh Mizo khawtlang nunah naupangte'n hmun pawimawh an luah a ṭul a ni, a ti.

Zonet Cable Tv Pvt Limited Director LV Lalthantluanga pawhin thu sawiin naupangte'n kawng dik an zawh theihna tura kaihhruaina ṭha leh chhungkaw ṭha an mamawhzia pholanna 'Hraileng Au Rawl' chu nakkum lamah pawh chhunzawm leh a ṭhaa a hriat thu a sawi.

'Hraileng Au Rawl' hi khua leh tui ṭha leh mi hmantlaka naupangte an lo ṭhanlen theihna tura Zoramin chhungkaw ṭha a mamawhzia pholanna lam hawi inelna a ni a, naupangten hlachham 'poetry' hmangin an nu leh pa, khawtlang leh ram hruaitute laka an beiseinate an au chhuahpui a ni.