Fashion Fusion ; Queen ni loin King kan hmu

Ningani zan khan Fashion Fusion chu MZU Multipurpose Hall-ah neih a ni a, hall khat mipui punkhawmnaah Queen of Fashion Fusion nei loin, kumin hian a vawi khatna atan King of Fashion Fusion kan hmu.

Kum 2010 aṭanga buatsaih Fashion Fusion-ah hian zirlai zir chhuak turte zinga a thiam ber an thlang ṭhin a, chu chu hmeichhia an nih chuan Queen of Fashion Fusion tiin mipa a nih chuan King of Fashion Fusion tih an ni. Kum dangah chuan Queen of Fashion Fusion hlir kan hmu ṭhin a, kumin­ah chuan PC Lalhriatpuia chu King of Fashion Fusion niin, Fashion Fusion-a King kan hmuh hmasak ber a ni a, he lawmman hi zirlai kal chhuak ṭha ber kan tih ang hi a ni. Tun batch-a zirlai zing­ah mipa pathum an awm.

Vakiria Institute of Fashion Technology hnuaia zirlai zirchhuak mi 29 ten Ningani zan khan an zir thiam thil an show. Zirlai pakhat zelin collection pali zel neiin, chu chu Mizorama model kan neih ṭhat ber ber 16 ten an rawn inbel chhuak. Theme hrang hrang neiin, chung an theme tilang chhuak thei tur chuan zirlaite hian thuamhnaw an siam.

Zirlaite kutchhuak hrang hrang aṭang hian judge pathum - Rinsangi (Rags Riches), Mahlui (Pearl) leh Vanlalruata (VeRuata) ten uluk takin an lo en a, lawmman dawngtu tur an thlang chhuak. PC Lalhriatpuia chu King of Fashion Fusion-ah thlangin, Best Collection hi Candy Lalnunpuii’n a dawng a, Best Craft Endorsement hi Laldingliana’n a dawng. Lalrawngbawli chu Most Creative-a thlan a ni a, Felfamkimi chuan Best Garment Construction dawngin, Lalhmingliani chu Most Commercially Viable-a puan a ni.