Melissa-i’n SNL a host leh dawn

White House press secretary, Sean Spicer pawh season hmasa lama lo kap tawh, Melissa McCarthy chu Sa­turday Night Live episode hnuhnung berah host-ah an hmang leh dawn a, ani bakah hian Dwayne ‘The Rock’ Johnson, Chris Pine leh Jimmy Fallon te host-ah an hmang bawk dawn.

SNL tun season-a episode hnuhnung ber paliah hian Melissa McCarthy hian May 13 khian a host ang a, The Rock hian May 20-ah a host ang a, ani hian kum 2015 May thla khan a lo host tawh. Jimmy Fallon hi April 15-ah kan hmu ang a, May 6-ah Chris Pine kan hmu ang.

SNL hian episode hnuhnung palite hi US-a time zone zawng zawngah a vawi khat nan an live vek dawn. US-ah hian time zone pakua a awm a, heng zinga mi Samoa Time Zone te, Chamorro Time Zone leh Hawaii-Aleutian Time Zone te chu Pacific tuipuia mite an ni. Eastern Time Zone-a dar 11:30-ah an chhuah ang a, He time zone hi New York te, South Carolina te nen, state 17 ten an hmang.

SNL hi kum 1975 aṭanga tihchhuah ṭan a ni a, tunah hian Season 42-na a kal mek. Tun Season hi nikum October aṭanga kalpui ṭan a ni a, tun thlengin episode 16 a kal tawh a, episode panga a la awm. Host leh musical guest an awm ṭhin a, episode 17-naah hian Louis C.K. chu host a ni ang a, musical guest hi The Chainsmoker a ni ang. Melissa, The Rock, Jimmy Fallon leh Chris Pine te host huna musical guest tur puan a la ni lo. Tun season-ah hian Bruno Mars, The Weeknd, Chance The Rapper, Lady Gaga te chu musical guest ni tawhte zinga mi an ni.