Global Youth Day hmang dawn

Khawvel puma Seventh-Day Adventist Kohhran ṭhalaite chuan vawiin hian Global Youth Day an hmang leh dawn. Kumin hian thisen pek uar tura tih a ni a, khawvel puma Adventist ṭhalaite chu he mi ni hian che chhuak tura beisei an ni.

Mizoram bikah chuan AYF hrang hrang ten an branch remchan dan ang zela hmang tura beisei an ni a, Aizawl khawpui­ah chuan AYF Branch pathum - Aizawl East, Aizawl West leh KLS ten a huhoin an hmang ang. Zing dar 10 aṭangin Aizawl Civil Hospital-ah thisen pek runpui neih a ni ang a, Millenium centre kawtah Gospel free concert huaihawtin a chhehvela mite hriat turin thuchahte sawi a ni ang a, Bible tract te sem a ni ang.