Miss India intihsiaknaa tel turin Miss Mizoram a tling

Miss Mizoram Rody H. Vanlalhriatpuii chu FBB Femina Miss India-a Mizoram aiawh turin a tling.

Nimina Gauhati Big Bazaar-a Northeast audition neihah nula 100 chuang an inlan a, hetah hian self-introduction, ramp walk leh question and answer hmanga audition an neih hnuin, Miss Mizoram 2017, Rody H. Vanlalhraitpuii hi Mumbai-a Miss India final-a inlan turin thlan a ni.

Miss India hi kum 54 chhung kalpui a ni tawh a, a neitu chu Times of India Group a ni. Kuminah hian sponsor turin FBB lo lutin FBB Femina Miss India tih a ni. India ram hmun hrang hrangah audition round hi neih a ni a, Rody hi Guwahati lamah Northeast audition neiin a tling ta a ni - Mizo zinga Miss India Final-a tling hi an la awm ngai lo.

Tehna hrang hrang an zam zingah, "Miss India Final Round-a tling tur hi san lamah Feet 5 leh inches 6 tal a ni tur a ni a, kum 18 leh 25 inkar mi, nula ngei an ni tur a ni a, tun hmain thubuai eng mah a nei tur a ni lo," tihte a tel a; India hmarchhaka nula nalh ṭhahnem tak kal khawm zingah Northeast state tin aṭangin mi pakhat ṭheuh an thlang ta a ni.

Miss India thlanna hi June-ah Mumbai-ah neih tur a ni a, contestant 30 an inlan dawn a, Colours TV-ah tihchhuah a ni ang; he inelnaa Mizoram aiawha tel tur Lawngtlai nula Rody hi 'Miss India Mizoram' tih a ni tawh ang.