Mi ropui Chuck Berry a liam ve ta

Kum 60 chhung vel zet music khawvela mi ropui leh hnuhma ngah, Chuck Berry chu kum 90 mi niin, Inrinni khan a chênna, St. Charles, Missouri, USA-ah a thi.

Music khawvelah chuan Chuck Berry hi kawng hrang hranga hriat hlawh a ni. Guitarist a ni a, chu mai bakah hla phuah a thiam em em bawk. Mi tam tak chuan 'Father of Rock N' Roll' tiin an sawi ṭhin a, a hla phuahte hi khawvela band leh zaithiam lar ber ber ten an saksak.

A hla phuah leh sakte hi Beatles, The Rolling Stones, The Beach Boys leh midang tam takin an sain, an sa chhawng. Music-a a sulhnu avang hian kum 1984 khan Grammy chuan lifetime achievement award an lo hlan tawh a, kum 1986 khan Rock N' Roll Hall of Fame-ah lakluh a ni.

A thi tih hriat a nih ve leh hian zaithiam lar tak takten an ui thu leh an sûn thu an tarlang nghal. Beatles drummer Ringo Starr te, Motown legend The Jacksons te, hla phuah thiam leh zaithiam Huey Lewis te, Bruce Springteen leh mi tam takin amah thlahna thu an sawi hlawm. Charles Edward Anderson "Chuck" Berry hi kum 1926 October 18 khan St. Louis, Missouri-a piang a ni.