Ed Sheeran-a Divide dinhmun a la nghet ṭha zel
Billboard 200 chart lamah chuan Ed Sheeran-a album thar ‘Divide’ chu a la ding nghet tlet tlawt a, pakhatna bawk a la luah.
Divide album hi kar liam ta chhung khan copy 180,000 lai hralh belh leh a ni a, heng zinga copy 87,000 hi album pangngai a ni a, a dang chu album tlukpui a ni. Divide album hi a tir kar hnih chhungin pakhatna a luah a, hetianga album tihchhuah, tihchhuah hlimchhawn kar hnih chhunga pakhatna luah thei hnuhnung ber chu Suicide Squad ost kha a ni.
Metallica album thar Hardwired...To Self-Destruct chu hralh a la kal hle reng a, pahnihnaah a awm. Hardwired...To Self-Destruct album hi album pangngaiin copy 100,000 lai an hralh a, album tlukpui nena an hralh zawng zawng zat chu copy 102,000 a ni. Metallica hian an ti thiam a, an concert tour neih tur pualin ticket nen an hralh kawp a, hei vang hian an album hi an hralh hnem phah.
Pathumnaah Beauty and the Beast original soundtrack a awm a, copy 57,000 hralh a ni. A movie lam a hlawhtlin tehreng nen a OST erawh chuti takin a ropui lo a, amaherawhchu pathumna lai a luah thei a, a turu hle tho. OST-ah hian hla 15 a awm a, Jesse Corti, Paige O’Hara te ho an zai.
Billboard 200 chart
“Divide (division sign)” - Ed Sheeran (180,000)
“Hardwired...To Self-Destruct” - Metallica (102,000)
“Beauty and the Beast (2017)” Soundtrack - Various Artists (57,000)
“24K Magic” - Bruno Mars (54,000)
“Moana” Soundtrack - Various Artists (52,000)
“Future” - Future (50,000)
“Starboy” - The Weeknd (44,000)
“Culture” - Migos (42,000)
“HNDRXX” - Future (39,000)
“Trolls” Soundtrack - Various Artists (32,000)