Beauty and the Beast a ropui ber
Russia lamah chuan naupang en chia an ngaih loh, Beauty and the Beast film chu kar liam ta khan chhuah a ni a, a ropui rem rem hle. US-ah hian PG Rating nena tihchhuah a ni a, PG Rated movie zinga ropui ber a rawn ni nghal.
Beauty and the Beast film, Emma Watson channa hian kar tawp ni thum chhung khan North America-a cinema ticket hralhna, box office aṭangin USD mtd 170 zet a thawk chhuak nghal a, PG Rated movie zinga chawlhkar khat chhunga sum lalut hnem ber a ni.
Kum 1991 khan animated movie-a tihchhuah a lo ni tawh a, hemi hmu phak loten an ngaina lehzual hle niin a lang. Tuna Beauty and the Beast movie entu zinga a tam ber chu tleirawl an ni a, chutihrual chuan kum 26 aṭanga kum 34 inkar entu an ṭhahnem le a, kum 12 hnuai lam pawh tam tham tak an ni bawk.
US leh Canada-ah chauh a hlawhtling lo a, khawvel hmun dangah pawh a hlawhtling hle. A bikin movie market ṭhatna, United Kingdom (England, Wales leh Scotland) leh China-ah a hlawhtling. North America pawn aṭanga sum a hmuh zawng zawng hi USD mtd 180 zet a tling.
Kong: The Skull Island chu pahnihnaah a awm a, kar tawp ni thum chhung khan USD mtd 28.8 a lalut a, North America aṭanga a lakluh zawng zawng hi USD 110 a tling ta. Logan chu pathumnaah awmin USD mtd 17.5 a lalut a, USD mtd 184 lai North America aṭangin a hmu tling tawh a ni.
Box Office movie-te
“Beauty and the Beast (2017)” - $mtd 170
“Kong: Skull Island” - $mtd 28.8
“Logan” - $mtd 17.5
“Get Out” - $mtd 13.2
“The Shack” - $mtd 6.1
“The Lego Batman Movie” - $mtd 4.7
“The Belko Experiment” - $mtd 4
“Hidden Figures” - $mtd 1.5
“John Wick: Chapter 2” - $mtd 1.2
“Before I Fall” - $mtd 1