Hollywood film-ah Mizo
Mizoram chhungah film industry a nung thar leh mek lai leh Hollywood-a minor role play pawh kan la sawi ngam loh laiin Mizo tlangval a lût ṭan mek. Lalmawizuala Chhunthang, Mark Mazuala tia koh, tuna Cape Town, South Africa-a awm mek chu Hollywood film lar, Lara Croft: Tomb Raider-ah minor role a chang mek. Hei bakah hian Hollywood film pangngaiah minor role dang chan a nei bawk.
Khuangleng khuaa
piang, Armed Venga awm zui ta Mark Mazuala hian Lara Croft-ah minor role changin, Asian digger lemah a chang a, Lara Croft chhanchhuaktu zingah a lang ang. Hei bakah hian Maze Runner an siam leh turah a chang dawn bawk a, Strange New Thing-ah a lang bawk ang. Maze Runner hi April 24-ah an shoot ang a, hetah hian raltlan lemah a chang dawn. A channa dang Empty Men-ah puithiam lemah a chang a, a lu pawh a ziat kawlh tul mai.
Minor role-ah a lang chho a, chu mi rual vek chuan major role ang deuh chang tura sawmna pawh a dawng mek. Mark Mazuala chuan, “Main role ang ve deuha chang tura sawmna pawh ka dawng a, Strange New Thing leh Indian Detective-ah te a ni. Keimah min dawr loin agent ka nei a, ka agent nan dawr mai ṭhin,” a ti. Indian Detective-a chang tura an sawmna hi a hnawl. “Film-a chang tura sawmna hi ka dawng nual a, a chang chuan châk ṭhin hle mah ila hnar a ngai ṭhin; ka zirna lam ka bahlah palh ka hlau a ni,” a ti.
Mark Mazuala hi South Africa-a khawpui lar, Cape Town-ah hian B. Com (Information System) a zir zo chiah a, kumin August thla aṭang hian Computer science-ah master degree a zir chhunzawm leh ang. Khuangleng khuaah piangin, a pi, Nawnkaii bula seilian a ni. Film-a a chan mai bakah hian advertisement chi hrang hrangah an hmang tawh bawk.