India aṭanga hausa ber Mukesh Ambani

22nd March, 2017

Fa pathum nei tawh, Reliance Industries-a chairman ni lai, Mukesh Ambani hi Business Today chuan India ram aṭanga zi chhuak zinga hausa ber tiin a tarlang a, a hausakna hi Rs. vaibelchhe 175,400 zet a ni. A hausak mai bakah thil a ti thei a, khawvel huap pawha huhang nei tham a ni. Forbes chanchinbuin kum 2016 chhunga khawvela thiltithei a tarlanah pawh 38-naah a lang pha a, India mi he list-a lang thei awm chhun a ni.

Hausa pahnihna chu SP Hinduja leh a chhungkua hi a ni a, Hinduja Group neitu a ni. An hausakna, Business Today-in a tarlan dan chuan Rs. vbch 101,000 zet a ni. SP Hinduja hi Hinduja Group chairman, share pawh ngah ber a ni. India mi a ni a, London-a cheng a ni. A pianna tak chu British India-a Karachi-ah a ni a, tunah chuan Pakistan ram chhungah a awm. An hnuaiah hian company hrang hrang a awm a, chung zingah chuan Ashok Leyland te, IndusInd Bank te, Gulf Oil Coporation Ltd. te hi kan hriat lar zualte a ni.

Dilip Shanghvi hi hausak lama pathumna a ni a, Sun Pharma dintu a ni a, a hausakna hi Rs. vbch 99,000 zet a ni. Padma Shri Dilip Shanghvi hi Mumbai-a cheng a ni a, khawvel huap zo pharmaceutical company dintu a ni. Damdawi an siam chhuak a, an hralh chhuak bawk.

Shapoorji Pallonji Group (SP Group)-a an hotu ber, Shapoorji Pallonji hi hausa palina a ni a, Rs. vbch 82,700 hu neia ngaih a ni. He SP Group hi construction, real estate, textile leh thil chi hrang hranga inhmang a ni a, an sumdawnna leh hnathawhna huang a zau hle. Kahpathir lama hriat hlawh Lakshmi Mittal chu hausakah pangana a ni a, a hausakna hi Rs. vbch 81,800 hu a nei.

HCL dintu leh chairman Shiv Nadar chuan Rs. vbch 81,200 hu sum neiin, parukna a ni a, Rs. vbch 75,400 hu nei. Cyrus Poonawalla, Poonawalla Group chairman chu pasarihna a ni. Wipro Limited-a chairman Azim Premji hian Rs. vbch 66,300 neiin pariatna a ni a, Kotak Mahindra managing director, Uday Kotak chuan Rs. vbch 49,200 a nei a, David Reuben & Simon Reuben te unau, property investor hlawhtlingte hian Rs. vbch 45,600 neiin hausak lamah 10-na an ni.