Billboard-ah Nicki Minaj-i’n record a siam ta

Billboard Hot 100-a lang thei hla nei hnem ber record chu Nicki Minaj hian a rawn siam ta.

Billboard Hot 100-a lang thei hla nei hnem ber ṭhin chu Aretha Franklin a ni a, Nicki Minaj hian kar hmasa mai khan a rawn nih rual a, tunkar chuan Aretha hi kalsanin, record a rawn siam ta. Hip-hop hmeichhe lama turu Nicki Minaj hla, Drake leh Lil Wayne nena an sak ‘No Frauds’ te, Regret in Your Tears leh, Lil Wayne nena an sak ‘Changed it’ te chu Billboard Hot 100-ah an rawn lang thar a, Aretha Franklin chungah Minaj a awm ta.

Aretha Franklin hian Billboard Hot 100-a lang thei hla 73 a nei a, Nicki Minaj hian hla 76 a nei ta thung. Nicki Minaj pel tur chuan ṭan fe a ngai ve tawh dawn a ni. Nicki Minaj hla, Billboard Hot 100-a lang thei zinga a tam ber hi midang nen an sak a ni a, Aretha Franklin erawh ama sak, solo hla a tam ber thung.