Bethsy A call girl!

Bethsy film chan hi ‘Damna Kim’ tih a ni a, April thlaa tihchhuah tura hma lak chhoh mek a ni. Bethsy hi harsatna hrang hrang paltlang call girl angin a chang a, a hringnuna harsatna a sual chhoh dan te he film-ah hian kan hmu ang. Bethsy-i tan thil thar a ni a, music lamah pawh hmachhawp tam tak a nei a, chutihlai karah chuan film lamah a inzep a, a channa hi en a chakawm tawh khawp mai.

Bethsy chuan, “Programme tam tak ṭhulhin he film lamah hian ka insawrbing. Thla ruk chhung zet kan chang a, music lam pawh ka ngaihtuah hman meuh lo,” a ti. “Film chan hi rin aiin a har a, a tir lam thla hnih khat phei chu harsa ka ti lehzual hle a ni. A hnu lamah erawh chuan a thawnthuah ka chêng a, chan pawh a nuam ka ti chho ta hle a ni,” a ti.

‘Damna Kim’ film-ah hian mi pahnih chanchin thlurbing a ni. Pakhat chu Bethsy-i role play, call girl chanchin bakah hian chhungkaw pakhatin an fa lak, Rintea chanchin thlur a ni. He film thawnthu ziaktu hi B. Lalbiakvela a ni a, director a ni bawk. Bethsy chanpui, fa lak lema chang hi Robin-a a ni a, ṭhalai lam hawi tur film a ni. He film hi Salem Unit ṬKP te siam a ni a, anni hian nikum khan ‘Lungloh tui’ film an lo siam tawh bawk.