Drake-a playlist beisei a sang

‘Views’ a tihchhuah a, a hlawhtlinpui hnuah Drake chuan a playlist ‘More life’ chu Inrinni kalta khan a tichhuak a, beisei a sang a, record siam thei tura ngaih a ni hial!

Expert-hoin an tarlan dan chuan tunkar chhung hian ‘More life’ hi equi­valent album-in unit nuai 2.75 tlin thei tura ngaih a ni. He playlist-ah hian hla 22 a awm a, a hmaa amah Drake-a’n record a lo siam tawh pawh khum thei tura ngaih a ni. Cnet-in a tarlan dan chuan Drake hi Spotify-a stream nasat ber a ni a, a hla zawng zawng an stream tawh zat hi tluklehding­awn 10 a tling tawh.

Tuna a tihchhuah tawh chin­ah ‘More life’s’ hian khawvel a hneh a ni ber mai. He playlist album-a hla awmte hi darkar 24 chhungin Apple Music-ah maktaduai 89.9 zet stream a ni; Spotify-ah vawi mtd 61.3 stream a ni bawk.