Bill Gates Amah aia hausa an awm thei lo

Forbes chanchinbuin a tarlan dan chuan Bill Gates hi khawvela pa hausa ber a ni leh a, a hausakna pawh nasa takin a pung. Nikum chhung khan USD tluklehdingawn 75 vel hu a nei a, kuminah phei chuan USD tld 86 lai a tling chho ta. Kum 61 mi, William Henry ‘Bill’ Gates hi kum 1995 aṭanga 2007 chhung khan khawvela mi hausa ber a ni ngar ngar a, hemi hnu hian amah aia hausa an rawn awm a, kum 2009 khan khawvela hausa ber ni lehin, a kum leh aṭangin pakhatna aṭangin a tla thla a, kum 2014 aṭangin pakhatna a rawn ni leh ta a ni.

Hausa ber dawttu hi sumdawng hausa, Warren Buffet a ni a, investor lian leh philanthropist a ni. Textile lama hmingthang, Berkshire Hathaway-ah kum 1970 aṭang khan chairman a ni. US president-a Donald Trump thlan tlin a nih aṭang khan a sumdawnna a kal tluang lehzual hle. Tuna a hausakna hi USD tld 76.1 lai a tling. Hausak lama pathumnaa rawn lang thar chu Amazon dintu Jeff Bezos a ni. Ani hi nikum ai khan USD tld 27.6 zetin a hausa tawh zawk a, tuna a sum neih zawng zawng hi USD tld 72.8 zet a ni.

Palinaah Amancio Ortega a lang a, ani hi Spanish clothing chain lar, Zara dintu a ni a, USD tld 14.8 a nei. Facebook neitupa Mark Zuckerberg chu panganaah a rawn lang thar a, USD tld 11.4 a nei.

Forbes-in a tarlan dan chuan nikum khan billionaire hi mi 1,810 an ni a, kuminah erawh chuan 2,043 lai an ni ta. Nikum aiin kuminah billionaire 233-in an tam zawk a, chu bakah billionaire thar 195 lai an awm. Heng zinga 76 chu China-a mi an ni a, lang thar an ngah ber a, a dawt chu US niin, US mi, billionaire thar 25 an awm. Billionaire zinga 227 chu hmeichhia an ni a, heng zinga 15-te chu mahni thawh chhuah leh beih vang liau liaua billionaire an ni. India mi billionaire 101 lai an awm.

Bill Gates
v Kum 1955 October 28-ah Seattle, Washington-ah a piang
v College a zir zo lo a, kum 1975 khan Microsoft lam atana inkhurbing a tum avangin college a chawlhsan
v College a chawlhsan hnu lawk hian New Mexico-ah license nei loa motor a khalh avang leh, red light pawisa loa a tlân luih avanga man a ni
v Hausa hle mah se a fate hi USD mtd 10 ṭheuh bak a rochhiah dawn lo. Naupangte pawisa tam tak hnutchhiah hi anmahni duhsakna a ni lo a ti tlat
v Kum khatah lehkhabu 50 tal a la chhiar ziah. Lehkhabu chhiar hi a inzirna hmanrua leh a hriatthiamna fiahna hmanraw pawimawh berah a ngai