Rebecca Lallawmsangi hla thar 'Ka neih chhun' a chhuak ta

'Ka neih chhun' hi SaiWanah Sailo hla phuah a ni.

Rebecca Lallawmsangi kan hria, a hla tihchhuah thar apiang a hit! Sawizui vak a ngai lo. Chuan, tunhnaiah artist rawn lar thar a awm a, chu chu SaiWanah Sailo a ni. SaiWanah pawh hi Zorimawi ngaithla ṭhintu ṭhalai zingah hre lo an tlem viauin a rinawm. Chutichuan, chumite pahnih thawk dun chuan hla thar an tichhuak a, nizan lamah khan Zonet lam chuan an tichhuak tawh.

'Kan khua' hitmaker hla rawn tihchhuah hi 'Ka neih chhun' tih a ni a, SaiWanah phuah a ni. SaiWanah hian hla eng emaw zat chu a tichhuak tawh a, chung zingah chuan Henz a thawhpuina 'Ṭhian' kha a lar ber a ni awm e. A lar vanglai takin Omomi thawhpuiin 'Tui leh Mei' a tichhuak leh a, chupawh chuan thla khat chhung vel lekin YouTube lamah thlirtu maktaduai 1.6 a 'hit' thei. Tunah Mizo lengzem artist lar ber pawl Rebecca-i a thawhpui leh ta a, beisei a lo sang deuh a nih pawhin a awm viau e.

Music video chu Daama chawngthu kut chhuak a ni a, recording chu Tluanga Hnamte, Westend Studio kut chhuak a ni thung.

Tunṭuma Rebecca-i hla rawn tihchhuah thar hi tunhnaia a hla tihchhuah dangte nen chuan a kalphung a dang deuh niin a lang a, hla lungkuai lam, lam nghawng nghawng aia lampui delh delh rem chi a ni mah zawk. Music video-ah hian hla phuahtu SaiWanah pawh kan hmu bawk.

Rebecca Lallawmsangi hla tihchhuah apiang hian million views a nei zel emaw tih tur a ni a, a tihchhuah hnuhnun ber, 'Astronaut' pawh khan thlirtu nuai sarih chuang nei leh der tawhin kan khua phei kha chuan thlirtu maktaduai 13 a nei tling tawh a ni.