Mizo sitcom hmasa ber KEIMAHNI a hnai ta

Miss India Mizoram 2018 Lily Darnei channa, Mizo sitcom hmasa ber tur chu tun thla tawp hian Runmawi App-ah en theihin a awm tawh dawn.

He comedy serial hi ACTIVE SOUND chuan sponsor-in buatsaihtu chu Mizoram lemchan khawvela mikhual lo tak Jerome Hauzel, Jeronimo Channel a ni.

Sitcom awmzia chu...
Sitcom chu 'situation comedy' tihna a ni a, ni tina kan hun tawn pangngai, a nuihzatthlak zawnga chanchhuahna a ni ber awm e. A changtute mizia leh nihphung ngai hlir hmangin series episode eng emaw zat siam a ni ṭhin a, a channa tur bik hi a hranpaa sak chawp emaw studio chhunga chan emaw a ni tlângpui bawk.

KEIMAHNI buatsaihtute pawh hian Champhai Primary School-II Hall hawhin, In pangngai ang chiahin an chei danglam vek a, senso pawh a sâng viau niin Show creator, Jerome Hauzel chuan a sawi.

Jerome-a chuan sawi chhunzawm zelin, an fiamthu kalphungah khawtlang emaw ram emaw Kohhran emaw mimal emaw beihna leh mei neia inkahna lam hawi zâwng a awm meuh lo a, hei vang hian Mizo mipuiin kan dawnsawn dan tur hriatthiam harsa a tih thu a sawi a, mahse fiamthu ngaina hrim hrim tan chuan a entlâk hlea a rin thu a sawi bawk.

A changtute lam ve thung
He Comedy Serial-ah hian, Lily Darnei bakah Champhai nula talent nei ṭha PCL Muansangpuii te, PUC Music Video aṭanga kan hmelhriat, lehkhabu pahnih tichhuak tawh, Maubawk tlangval Hriatpuia Kion te, CKṬP & MSACS buatsaih film competion-a Best Actor lawmman latu Faka Hnamte, Chhinga Veng leh Zonet crime serial 0389 aṭanga kan hmelhriat ṭan, CKṬP Film 'Hnehtu' a changtute zinga mi, Chanmari tlangval Maruata Rawite te chu a changtu berte an ni dawn.

Anni bakah hian Guest starring atan Miss Mizoram 2018 Thanthani te, Mizo zaithiam zinga lar ber pâwl K. Hminga te leh Triau Trackx drummer leh songwriter Ramenga Ramboss-te hmel pawh kan hmu bawk dawn a ni.

Khawiah nge en tur?
KEIMAHNI hi Runmawi App-ah dah a ni dawn a, ruahman lâwk dan chuan tun thla tâwp lam hian release hman an inbeisei a ni. Season 1-ah hian a vaiin Episode 10 a awm dawn a, episode khat hi minute 35 aiin a sei vek a, tin, hnam dang pawhin an en ve theih turin Translation/subtitle dah a ni dawn bawk.

Kar hmasa lawk khan a tihlarna tur KEIMAHNI OST Official Music Video chu an lo release tawh a, Jeronimo channel, YouTube lamah en theihin a awm. He serial chungchang hi hrechiang duh tan chuan, Instagram page, keimahni_official-ah follow theih reng an ni bawk e.