US Defense-in hnathawktu a ngah ber

Company leh department hrang hranga hnathawktu ngah ber ber thlan chhuah a ni a, chung zingah chuan US Department of Defense chu thawktu ngah ber a ni.

World Economic Forum-in khawvel ram hrang hranga private leh sorkar hnuaia hnathawktu tam dan a tarlang a, US Department of Defense chuan hnathawktu a ngah ber a, mi maktaduai 3.2 zet hemi hnuai­ah hian an thawk mek. Hnathawk ngah pahnihna pawh sipai lam kaihhnawih tho a ni a, China sipai, People's Li­beration Army chu thawktu ngah ber dawttu niin, hnathawktu maktaduai 2.3 zet an awm.

US-a innghat, multinational retail corporation lian, Walmart chu private firm zinga thawktu ngah ber a ni a, khawvel pumah pawh pathumna a tling pha. He corporation hi khawvela food chain lar ber zinga mi a ni a, a thawktu hi maktaduai 2.1 lai an tling. Thawktu ngah palina pawh food chain lam tho a ni a, chu chu McDonald a ni. McDonald hi khawvela fast food restaurant chain hlun ber a ni a, tun­ah hian thawktu maktaduai 1.9 an awm a, ram 119-ah dawr an nei a, nitin mi maktaduai 68 ten an dawr ziah ṭhin. McDonald hi Richard leh Maurice McDonald tena kum 1940-a an din kha a ni.

UK hi ram lian lo te mah ni se, an health service khu chu a lian hle. UK National Health Service-ah hian thawktu maktaduai 1.7 zet an awm a, khawvela single-payer health care system upa ber a ni a, thawktu ngah lamah khawvela pangana a ni.

China National Petroleum Corporation chu thawktu ngah lamah parukna a ni a, thawktu maktaduai 1.6 a nei mek a, State Grid Corporation of China chuan thawktu maktaduai 1.5 neiin pasarihna a ni a, Indian Railways chuan thawktu maktaduai 1.4 neiin pariatna a tling pha a, Indian Armed Forces chuan thawktu maktaduai 1.3 neiin pakuana a ni. Taiwan-a mi, electronics lam pang, Hon Hai Prescision Co chuan thawktu maktaduai 1.2 neiin 10-na a ni.