Inter College Quiz first round zo
Mizo Students' Union buatsaih, MPSC Challenge Inter College Quiz Competition 2017 chu chhunzawm mek zel a ni. Zirtawpni zan khan first round an zo a, college pariat chauh an dam ta.
MPSC Challenge Inter College Quiz-ah hian Mizoram chhunga college lian zual 17 an tel a, heng zing aṭang hian first round paltlang college pariat an awm, Quarter Final-ah heng college te hi an an inel leh dawn. Quarter Final lutte hi T. Romana College, Govt. Aizawl College, Hrangbana College, Kolasib College, Aizawl City College, Aizawl West College, Aizawl North College leh Khawzawl College te an ni. Heng college te hian Thawhlehni zan dar 8 aṭangin inelna an chhunzawm leh ang.
Quarter Final-ah hian college hrang hrang te Live Phone In Round a awm tawh dawn a, college zirlai leh zirtirtu 20 te tan phone hmanga zawhna siam tur a ni ang. He Competition hi Mizorama Mizote bank awm chhun Apex Bank leh CCDU te sponsor a ni a, ZoFood chuan zan tin Zofood Best Quizee (best performer of the night), zan khata chhang dik hnem ber hnenah lawmman an pe ṭhin bawk.Quarter Final-a ti ṭha college paliten semi final an lut ang. Quiz hi Ignite Studio, Khatlaah zan dar 8 aṭanga neih ṭhin a ni a, Zonet Bawhbel leh LPS 10 ah te Live Telecast-a pekchhuah ṭhin a ni.