SoundCloud tan thu lawmawm
Khawvel huapa streaming platform lar pawl tak, audio distribution platform ni bawk SoundCloud chu tluchhe mai tur leh, hralh mai ngai anga an sawi laiin he streaming platform, Berlin, Germany-a innghat hian USD mtd 70 vel fund a dawn avangin tlemin a dinhmun a ziaawm hret.
Dinhmun ziaawm hret leh USD mtd 70 vel a dawng tia SoundCloud an sawi lai hian an mamawh ang zat tak erawh an la hmu tling lo. SoundCloud hi a hma anga kal zel thei tur chuan USD mtd 100 vel a mamawh a, amaherawhchu mtd 100 an tlin lo. Ares Capital, Kreos Capital leh Davidson Technology te chuan he streaming platform hi an fund tih tarlan a ni. SoundCloud hi a dinhmun a ziaawm zel loh chuan USD mtd 700 tling loa hralh theih tur nia sawi a ni. Investor-te aṭanga sum a hmuh hmang hian hma an la chho leh ang a, hma an sawn loh chuan hralh tho chu a ngaih hmel viau.