Rebecca Saimawii Norway-ah zai dawn

Mizo zaithiam chuai thei lo Rebecca Saimawii chu Norway-a Froland-ah Aung Suu Kyi Park, Norway-in an sawm angin June 18, Inrinni hian Frolands-ah a zai dawn.

Aung Suu Kyi Park lam hian nikum lamah pawh khan an programme-ah sawm tawhin online-in a zaisak tawh a, chupawh chu a hit hle a, a zai video ringawt pawh maktaduai 4 chuang zetin an thlir hial a ni. Chumi a nih avang chuan kuminah hian an sawm leh ta a, kuminah erawh a hmun ngeiah a zuk kalin a zuk zai dawn ta a ni.

Rebecca Saimawii a kal dawn tih an hriat hian National Unity Government of Myanmar (NUG) lam pawhin July 2-ah a pualin concert an buatsaih dawn bawk.

Aung Suu Kyi Park hian July 16-18 hian festival an hmang dawn a, June 19-a Aung San Suu Kyi piancham puala buatsaih niin he festival aṭanga an sum hmuh chhuah hmang hian Myanmar lama sipai rorelna hnuaia harsatna tawkte ṭanpuina turin an hmang ang.

Rebecca Saimawii chuan, "Myanmar revolution tana theihtawp ka chhuah vena leh an tana zai hmasa ber ka nihna te hriain min rawn ngaihlu ve a ni," tiin a zai tur chungchang hi Vanglaini a hrilh. Rebecca-i hian Aung San Suu Kyi piancham pual hian hlate pawh lo phuah tawhin chupawh chu Myanmar mite'n an ngaihlu hle a ni.