Mipa naupangin Ed Sheeran a hneh

Comic Relief ni pawimawh, rethei leh harsa, ṭanpui ngaite mipuiin ṭanpui duhna thinlung an neih theih nana an buatsaih, Red Nose Day-ah Ed Sheeran chuan mi rethei, in leh lo nei lo naupang a hmu a, kalsan har a ti.

Kumin Red Nose Day hi Zirtawpni, March 24 kha a ni; he ni hian Ed Sheeran chuan Liberia rama harsatna tuarte a tlawh a, mipa naupang pakhat, in leh lo pawh nei lo, hmun remchanga riak mai ṭhin a hmuh chuan a rilru a khawih a, a hneh hle. Naupang hian a chanchin hrilhin, a nu leh a pu chu Ebola avangin a chân a, a pa chuan a duh lo bawk. Chutiang a nih avang chuan in leh lo, chênna tur pawh a nei lo a, kawtthler­ah a khawsa mai mai a, zanah lawnglêngah a riak ṭhin.

Ed Sheeran chuan, “Ka rilru chuan chu naupang chu ka motor-a dah a, hruai mai ka duh hial. Khawpui khawiah emaw hruai a, a awm dan tur tih fel hma chu hotel-a awm­tir mai ka duh a ni,” a ti. Ed Sheeran leh a team-te hian naupang hi hmun him zawkah hruaiin, a awmna tur an ruahmansak. Comic Relief programme hi telethon chi khat a ni a, ram retheiah milarte kaltirin, mi retheite an kawmtir a, chu chu TV-ah tichhuak lehin, mipuiin mi harsate ṭanpui duhna an neih theih nan hma an la ṭhin.