Britney Spears-in pasal a nei

Britney Spears leh Sam Asghari-te chu Ningani khan Los Angeles-ah mi tlemte hmaan an innei.

A conservatorship aṭanga chhuah zalen a nih aṭanga thla sarih hnuah Britney Spears leh Sam Asghari-te chu an innei ta a, an inneih hma lawk hian kum 2004-a darkar 55 chhung lek pasala a neih zawk Jason Alexander chuan an innei tur chu tihbuai a tum niin khawthlang media-te chuan an tarlanga, Police-te'n an man zui niin an tarlang bawk.

Britney leh Asghari-te hi kum 2016 khan a Slumber Party music video an siamnaah khan an intawng a ni. Tunah hian Britney hi kum 40 lai ni ve tawhin Asghari hma hian pasal pahnih Jason Allen Alexander leh Kevin Federline-te chu nei tawhin fa pahnih a nei tawh bawk. Tuna a pasal thar Sam Asghari hi kum 28 mi a ni thung.