'Ghostbusters' animated film buaipui ṭan

'Afterlife' Sequel New York City lamah a lut leh tawh dawn

'Ghostbusters' fan-te tan thu hriat nuam tak hriattur a awm e! 'Ghostbusters' animated film chu tunah hian buaipui ṭan mek a ni a, 'Afterlife' chhunzawmna pawh an siam leh dawn bawk e.

'Ghostbusters' film hmasa ber kha June 8, 1984-ah tlangzarh niin chumi lawmna chu kumtin neih ṭhin a ni a, Ghostbusters Day tiin an sawi ṭhin bawk. Chumi lawmna pual chuan Nilaini khan Sony Pictures bakah Ghost Corps’ Jason Reitman leh Gil Kenan-te chuan thuchhuah siamin animated film thar siam a nih dawn thu leh 'Afterlife' chhunzawmna siam a nih dawn chungchang hi an sawi a ni.

Jason Reitman leh Kenan-te bakah Sony Pictures Animation thawkho chuan animation film hi an siam dawn a, Chris Prynoski (executive producer, “Beavis and Butt-Head Do the Universe”) leh Jennifer Kluska (“Hotel Transylvania: Transformania”) te chuan an direct dawn a, Brenda Hsueh chu script ziaktu tur a ni dawn bawk.

Jason Reitman chuan nikuma tihchhuah 'Ghostbusters: Afterlife' chhunzawmna siam a ni dawn tih a sawi chiang bawk a, New York City lama thil thleng anga an siam dawn thu leh Firehouse ngei mai chu an chet tlatna tur a nih leh thu a sawi.