Ṭhazual Award Gospel artist perform turte a hriat ta

Mizorama rimawi award ngaih hlut hlawh Zonet Ṭhazual Award sem hun a hnai zel a, Ningani zanah hian Gospel artist-te pual bika hun hman tur niin, Zirtawpni zanah hian Lengzem artist-te pualin hun hman a ni thung ang.

Hripui leng vangin ruahmanna hmasa an kaltlangpui thei lo a, chumi a nih avang chuan sorkar dan dinglai zawmin Ningani zanah hian SOP zawm chung siin zan dar 8-ah Vanapa Hall-ah award semna hun zan hmasa zawk hi hman a ni dawn a, zaithiam inlan an ṭha dawn. 

Gospel huangah hian Hmingtea Chhangte chu nomination hmu hnem ber a ni a, Best Male Artist, Best Music Video leh Best Group/Duo-ahte a hming a lang a ni. Gospel bik hi category paruk- Best Female Artist, Best Male Artist, Best Music Video, Songwriter of the Year, Best New Artist leh Best Group/Duo-ahte ṭhen hran a ni.

'Thangkhawk aw mawi' tih hla thiam taka satu Ruthi Zonunsangi a zai dawn a, live-ah a zaithiam  zia hrechiangtute tan chuan a nghahhlelhawm hle dawn tih a chiang. 'Thangkhawk aw mawi' a rawn sa dawn nge 'Ka lawm e Isu' a rawn sa dawn hriat a la ni lo a, Ningani zan nghak fan fan phawt mai ang.

Best Male Artist Gospel award dawng thei dinhmuna ding mek Amtea zai kan ngaithla dawn. 'Ka nghing lo ang' tih hla hmanga Zoram deng chhuaktu Amtea zaithiam zia kan hre tlang ṭheuhin a rinawm a, a bikin live-a perform tur phei chuan Mizo zaithiam zinga a 'ber' zinga mi a ni ngei e. Eng hla nge a sak dawn la hre lo mah ila beng a tlai dawn tih a chiang.

Gospel singer mipa rualin tunhnai khan band an din thar a, a band hmingah Faktu tiin an invuah. Anni pawh hi Best Group/Duo Gospel category-a hming lang pha an ni a, band anga live-a an zai ho hmasak ber tur pawh a ni mai thei. 

Mapeka, JH Lungmuana, Bete-a, Sangzuala Chhangte leh Bk-ate zai hi a ngaihnawm lo thei lo.

Mizo Idol hmeichhe hmasa ber Grace Lalchhanhimi a zai dawn. Kolasib nula hi zaithiam kan ti tlang a, Ṭhazual Award ceremony thlirtute min awi tur chuan a ni aia ṭha hi an awm bik chuang awm lo e. Ani pawh hi Best Female Artist Gospel award dawng thei tur zinga mi a ni.

Gospel award sem zanah hian rock music kan ngaithla dawn, Shirock 2019-a pahnihna ni thei Swordtune zai hian award sem ceremony thlirtute min buk tir suau suau dawn a nih hmel. Anni hi Best Group/Duo Gospel category-a nominee an ni bawk.

Best New Artist Gospel award dawng mai thei dinhmuna ding mek, tunlai Gospel singer zinga lar ber pawl Stacy Punte zai kan ngaithla dawn. Eng hla nge  a sak dawn la hre lo mah ila beng a fah hle dawn tih a chiang. A zai a mawi dawn sa a, a nung bawk ang tih chu YouTube vela a zai ngaithla ṭhinte chuan an ring thiam sa ang.