Zarmawia'n hla a phuah dan a sawi ; Album thar 'Rimawi ropui ber' a tichhuak dawn

C. Lalzarmawia chuan, "A chang chuan ka rilruah hian hla thu a lo lut ṭhin a, a chang chuan hla thupui tur emaw hla thuin kawng a zawh thu a lo lut hmasa ṭhin bawk. A chang chuan hla thluk a lo lut a, chumi zuia hla thu hmehbel takte a awm bawk," a ti. Hla 65 lai a phuah tawh a, a hla phuahte hi album-a siamin a tichhuak tawh hlawm. Ama sak a hla phuah khungkhawmna album hi pathum a ti­chhuak tawh , live recording album-in, midang saktirna album pakhat a tichhuak tawh bawk.

A hlate hi Pathianin a hmang hle a, sak hlawh ber ber an ni. Zarmawia chuan, "Pathianin hla min pekte hi eng vangin nge a hman ṭhin ka hre lo a, khawngaihna nasa tak a ni ringawt mai. Keima lamah hi chuan chhuan tur a awm lo mai ni loin, fel lo leh tling lo ber ka ni a, keimah hi chu ka insitin ka inhaw fo ṭhin," a ti.

Tunah hian a hla phuahte live recording album-a tichhuak turin a inruahman mek a, June thla hian tihchhuah hman a tum. A album hming tur hi 'Rimawi ropui ber' a ni a, he album-ah hian ama hla phuahte amah leh zaithiam lartena an sak a dah dawn. Hla 12 a awm ang a, heng zinga hla pasarih chu kan hriat sa a ni ang a, hla panga erawh hla thar a ni thung.

'Rimawi ropui ber' album-ah hian amah bakah TBCA, Andrew-a, Dadina, Bethsy, Pensy leh Temii te an zai ang. Musician a nei ṭha a, Tea, Nelsona, Faktea leh Isaaka te a tihpui a, Aizawl aṭangin Maenga leh Puipuia ten an pui bawk.