Drake-a’n a concert tur a tihlawhtling thei lo ; Ama record siam tawh bawk a rawn khum

‘More life’ album chu hralh tam namenin an hralh tam lo a, Billboard 200 chart-ah pawh pakhatna a luah chiang. Hetiang hi a nih mek laiin, Drake hi a dam ṭhat loh avangin Amsterdam, Netherlands-a a concert tur a ṭhulh.

Thawhṭanni zan khan Amsterdam-a concert tur a ni a, amah­-erawhchu a dam ṭhat loh avangin a tihlawhtling thei ta lo a, mipui kalkhawm vek hnuah promoter-in stage aṭangin a zai theih loh tur hi a puang chhuak. Drake hi a damlo na viau a ni mai thei a, a doctor chuan perform rih lo turin a hrilh. Amsterdam-a concert a neih tum hi a ṭhulh ngun ta viau. January 20 khan concert tawh tur a ni a, amaherawhchu January 26-ah sawn a ni a, a theih loh leh avangin tun Thawhṭanni zan kha tih leh a ni a, chu pawh a tihlawhtling thei ta lo.

Damlohnain a tlakbuak lai hian America lamah a ropuina a zual zel a, ama record lo siam tawh a rawn khum leh. Billboard Hot 100 chart-a ṭum khata hla lang thei nei hnem ber record a siam tawh chu amah vekin a rawn khum.

A hmaa Drake-a’n record a siam chu ṭum khata Billboard Hot 100-a lang pha hla nei hnem ber a ni a, hla 20 hmangin he record hi a siam. Tun­ah hian More Life album-a hla 22 awm te chu a vaiin Billboard Hot 100-ah hian a lang vek a, chu bakah chuan a hmaa a hla hit pa­hnih a la lang bawk. Ṭum khatah a hla 24 te Billboard Hot 100-ah hian lang vekin record a siam.

Hei bakah hian Billboard Hot 100-a lang pha hla nei hnem ber a ni a, a hla 154 te he chart-ah hian a lang tawh a, Lil Wayne a rawn khum. Hmeichhe lamah chuan Nicki Minaj chu a ber a ni a, a hla 77 a lang ta a, a hma khan 76 a ni. Nicki Minaj hla lang thar hi Jason Derulo nena an sak ‘Swalla’ a ni a, hei nen hian a hla 77 a lang ta.