Adele-i’n tour a nei zel tawh lo mai thei
Australia lama a tour ringawt pawhin thawm a nei lian a, Adele concert tour hi a turu hle. Hetianga a hlawhtlin viau lai hian Adele chuan nakin zela tour erawh a tum tawh lo mai thei.
New Zealand Herald-in a tarlan dan chuan Auckland-a Mount Smart Stadium-a a concert-ah fan-te a hrilh dan chuan “Min fak nasa lutuk a, min fakna avang hian keimah ka chak loh phah zawk dawnin ka hria. Tour hi ka nei leh ngai ang em tih ka sawi thei lo a ni,” a ti.
Adele hian concert tour hlawhtling neiin, stage-ah pawh chuangkai viau tawh mah se tun thlengin stage-a han lan hi a la hreh em em a, ngaiah a nei thei lo. “Live performance hi tun thlengin ka la hlau reng mai a, thil thar han tihchhin hi ka hreh em em reng a ni,” a ti. Down Under-a a tour hi a hlawhtling hle a, concert a neihna tura ticket hralh zawh ṭhak ṭhak a ni a, ticket a hralh chhuah zawng zawng hi nuai ruk a tling tawh. Sydney khawpuiah phei chuan concert-ah hian mi nuai khat chuang lai an pungkhawm. Melbourne-a a concert-ah pawh khan entu 75,000 zet an awm.