'Heart' biopic an siam mek: Ann Wilson

'Heart' band hming hi i hre tawh ngai em? I hre lo a nih pawhin i demawm loh e, an lar vanglai kha 70's chho a ni daih tawh a, he thu chhiartu tam tak hi chuan khawvel eng an la hmu miau lo a. Anih 'Alone' tih hla tal i hria em? Rimawi tuipuitu i nih chuan he hla hi chu i hre ngei turah ngai ang.

i-Ten hla 'Alone' cover-a larpuitu 'Heart' lead singer Ann Wilson chuan SiriusXM’s Volume West-in an interview-naah an band biopic chu Amazon-a pek chhuah tura buaipui mek a nih thu leh an musician pui, Seattle mi Carrie Brownstein chuan a script a buaipui bakah a direct dawn thu a sawi. Tlema rual u deuhte tan chuan thu lawmawm tak a ni ngei dawn e.

Ann Wilson chuan a draft script pawh a hmuh tawh thu leh ṭha a tih thu a sawi a,  Brownstein chuan Sleepless in Seattle leh Interstellar lama sulhnu ṭha tak lo hnutchhiah tawhtu producer Lynda Obst a thawhpui bawk a, "Script chu kan naupan lai aṭanga inṭanin 90's vel bawrah tihtawp a ni," a ti.

Amazon leh Brown-stein chuan Wilson thusawi hi la nem nghet lo mah se a sawitu ngaihtuah hi chuan thudik a ni ang tih a rinawm sa a ni.

Wilson chuan Covid-19 hripui leng vangin film siam hna pawh chak takin kalpui theih a nih loh thu a sawi a, lemchan thiam an film-a chang tur pawh an awm nual tawh tih sawiin amah bakah a laizawn leh a bandmate ni bawk Nancy Wilson lema chan duh lemchan thiam lar tak tak an awm thu a sawi.

"Anne Hathaway pawh chung zingah chuan a tel a, mahse a inhmeh ka ring chiah lo," tihte thlengin a sawi a ni.

American rock band Heart hi kum 1970 khan Seattle-ah an indin a, 70's laihawlah leh 80's tir lam thleng khan an lar ṭhin hle. An chuai mai dawn emaw tih hnuah kum 1985 velah khan rawn lar thar lehin 90's laihawl vel thleng kha chuan hriat an la hlawh hle.

'Magic Man', 'Crazy on You', 'These Dreams' leh 'Alone' hmangtein khawvelin a hria a,  khawvel pumah an record hi maktaduai 35 chuang zet an hralh a, US-ah ringawt album copy mtd 22.5 an hralh thei a ni.

VH1 "100 Greatest Artists of Hard Rock"-ah 57-na an ni phak a, kum 2013 khan  Rock and Roll Hall of Fame-ah lawmluh an ni tawh bawk.