Mizo zinga thisen pe tam pathum hnenah Golden Arm Award hlan

RC Rokhum leh C. Lalremruata-te chuan unit 83 ve ve an pe tawh a, Rebecca Saimawii chuan vawi 75 a pe tawh bawk.

National Integrated Forum of Artists and Activists (NIFAA) Mizoram Chapter chuan Zirtawpni liam ta zan dar 8:30-ah khan Mizo zinga thisen pe tam zual pathum RC Rokhum, C. Lalremruata leh Rebecca Saimawii-te hnenah online-in chawimawina 'Golden Arm Award' a hlan.

NIFAA INDIA hian March 23, 2021 khan India ram zalenna sualtu, ram tana martar pathum- Bhagat Singh, Rajguru leh Sukhdev-te hriatreng nan blood and plasma donation India ram pum huapin a huaihawt a, world record thar a siam hial a, chumi campaign hriatrengna atan chuan NIFAA Mizoram Chapter chuan National Headquarters hnena rawtna an thlen bawhzuiin heng mi pathumte hnenah hian chawimawina an hlan ta a ni.

Online hmanga chawimawina inkhawm an hman hi Alex Zosangliana, Secretary Mizoram chapter chuan kaihruaiin NIFAA hmalakna tlangpui report a pe a, Jacinta Vanlalengzami, Mizoram Chapter President chuan thusawiin midangte nun chhan nana thisen petute chu chawimawi phu an nih zia leh an mihring puite tana an hlut zia a sawi a, Mizo mipa thisen pe tam ber pahnih a chhuan thu a sawi bawk.

RC Rokhum leh C. Lalremruata-te'n vawi 83 ve ve mamawh te tan thisen an pe tawh tih sawiin, "Hnam dang hmeichhiate'n thisen pekte an hlauh a, an ṭih em em laia Pi Rebecca Saimawii'n vawi 75 lai mai thisen a pe thei chu hmeichhia te tana entawn tlak, hmahruaitu a ni," a ti. NE India a ni emaw India ram pum huap a ni emaw, Rebecca-i aia thisen pe tam hmeichhe zinga a la hriat loh thu a sawi tel bawk a ni.

Pritpal Singh Pannu, National chairman chuan Award dawngtute a lawmpui thu leh a chhuan thu a sawi a, he inkhawmah hian district hrang hranga NIFAA hruaitu leh Mizoram State headquarters North Vanlaiphai a hruaitute an tel bawk a ni.