BTS-in 'Yet To Come' hmangin Spotify-ah record an siam

Zirtawpni liam ta khan hun eng emaw chen album an tihchhuah tawh loh hnuah Korean super-group BTS chuan anthology album 'Proof' an tichhuak a, chuta hla thar an dah pathum zinga mi 'Yet To Come' chuan Spotify-lamah record a siam.

Eng record maw?
'Yet To Come' hi tlangzarh a nih ni khan Spotify global chart lamah pathumna niin vawi 7,178,605 lai stream a ni a, a hmaa BTS vekin record an lo siam tawh, Korean hla Spotify lama ni khat chhunga stream nasat ber record chu an rawn khum a ni.

Chutichuan...
An album tihchhuah tharah hian an hla hlui eng emaw zat bakah hla thar pathum 'Run BTS,' 'For Youth,' leh 'Yet to Come'-te chu awm telin heng hla pathumte hi Spotify daily Global Top 200 chart-ah dinhmun sang takah an lang nghal vek bawk.

'Run BTS' chu parukna a ni a, 'For Youth' chu 11-na ni bawkin an hla dang eng emaw zat chu chart-ah an lang bawk a ni.

'Proof' hi BTS anthology album hmasa ber a ni a, CD1, CD2 leh CD3 awmin hla 48 lai a awm. Album an tlangzarh ni khan ram hrang hrangah copy maktaduai hnih vel chu an hralh hman nia tarlan a ni bawk.