'Star Wars' star David Prowse a thi

'Star Wars' film hmasa pathuma Darth Vader lema chang English actor David Prowse chu an ram huna Inrinni zingah khan kum 85 mi niin a thi.

David Prowse hi original Star Wars trilogy-ah khan Darth Vader lema changin a hmel tak tak erawh a lang lo a, a aw pawh kha James Earl Jones aw a ni daih. A agent Thomas Bowington chuan Inrinni zanah khan a thih thu hi tichiangin Bowington Management pawhin Twitter lamah Prowse thih thu hi an puangzar ve bawk.

Lemchan thiam a nih piah lamah hian weightlifter leh bodybuilder lar tak a ni bawk a, Ft 6'7" laia sang a nih bawk avangin a pasanna hi a larpui ṭhin hle a ni.

Frankestein lema a chan avangin a lar hle bawk a, The Horror of Frankenstein (1970) leh Frankenstein and the Monster From Hell (1974)-ahte khan a chan bakah James Bond film Casino Royale (1967)-ahte pawh khan a inlan a, film 20 chuangah inlanin sulhnu a hnutchhiah ṭha hle.