Fbb Colors Femina Miss India East Zone ; Mizo nula Rody hnenah sub title 2
Thawhlehni zan khan kumin June thlaa Femina Miss India thlan turah East Zone aṭanga tel tur zawnna chu zawh a ni. Fbb Colors Femina Miss India East Zone 2017-ah hian India hmarchhak state pasarih bakah, Bihar, Chhatisgarh, Odisha, Jharkhand, West Bengal leh Sikkim aṭanga an state aiawh tur thlan chhuah a ni. East Zone bika intihsiaknaah hian Miss Mizoram 2017, Rody H. Vanlalhriatpuii chuan Miss Talented leh Miss Refreshing Beauty te a la.
Fbb Colors Femina Miss India East Zone 2017 hi Kolkata-a Swissotel-ah neih a ni a, judge pathum awm sa bakah Indian footballer hlawhtling ber Bhaichung Bhutia chu East Zone final zanah hian guest judge a ni. Judge pangngaite hi Usha Uthup, zaithiam hlawhtling, Filmfare Award for the Best Female Playback singer pawh lo dawng tawh a tel. Judge dang, Parambrata Chatteejee hi Indian Bengali actor a ni a, Kahaani film-ah khan Vidya Balan nen an chang nghe nghe. India rama model actress hlawhtling, Bollywood film velah pawh chang fo, Dipannita Sharma chu judge zingah a ṭhu a, Kolkata fashion industry-a hlawhtling, Abhishek Dutta chu judge a ni bawk.
Sub Contest-a winner hrang hrangte puan a ni a, Miss Mizoram 2017 Rody H. Vanlalhriatpuii chuan Miss Talented leh Miss Refreshing Beauty te a dawng. Sub Contest winner zingah Miss Assam chu telin, Triveni Barman hian Miss Glowing Skin a dawng a, Miss Rampwalk chu Miss Bihar, Priyanka Kumari-i’n a dawng. Miss Photogenic-ah Miss West Bengal, Ankita Kumari thlan a ni. Miss Fashion Icon hi Jharkhand finalist, Vamika Nidhi chuan a dawng a, ani hian Miss Body Beautiful a dawng bawk. Miss Vivacious atan Bihar finalist, Neha Jha puan a ni a, hei bakah hian Miss Congeniality a la bawk.
Fbb Colors Femina Miss India East Zone-ah hian state 13 awmin, state ṭhenkhat aṭang chuan contestant pathum laite an awm. State tin aiawha June thlaa Grand Finale awm turah pakhat ṭheuh an tling.
East Zone aṬanga tlingte
Bihar
Priyanka Kumari
Chhatisgarh
Vinali Bhatnagar
Odisha
Christeena Biju
Jharkhand
Vamika Nidhi
West Bengal
Shivankita Dixit
Sikkim
Roshni Ghimirey
Assam
Tribeni Barman
Nagaland
Kaheli Chophy
Mizoram
Rody H Vanlalhriatpuii
Manipur
Soibam Kanchan
Tripura
Rinky Chakma
Meghalaya
Kiran Laishram
Arunachal Pradesh
Licha Thosum