Khawvela lal ni rei ber dawttu Lalnu Elizabeth II

Britain Lalnu Elizabeth II chuan Pathianni khan Thailand lal khumin, France-a Louis XIV dawta lal dinhmun chelh rei ber a ni ta.

United Kingdom hian kum 96 mi, Lalnu Elizabeth-i kum 70 a lal lawmna, Platinum Jubilee lawmna chu kar hmasa khan an hmang.

Lalnu Elizabeth-i hian Pathianni khan kum 1927-2016 inkar, kum 70 leh ni 126 chhung lal dinhmun chelhtu, Thailand Lal Bhumibol Adulyadej record lo siam chu a rawn khum a ni. France lal Louis XIV chu khawvela lal ni rei thei ber niin, kum 1643-1715 inkar khan kum 72 leh ni 110 chhung lal dinhmun hi a lo chelh tawh a ni.

Kum 1953 aṭanga Britain lal ni tura lallukhum an khum tir, Lalnu Elizabeth II hi September, 2015 aṭang khan British chanchina lal ni rei thei ber a lo ni tawh a, Queen Victoria record chelh lai chu a lo khum tawh a ni.

UK leh Commonwealth ramah-te hian Platinum Jubilee pualin ni li chhung royal parade, street party, pageantry leh event hrang hrang an buatsaih a ni. Lalnu chuan an ram mipuite chawimawi danah a lawm thu sawiin, an inpumkhatna chuan kum tam tak chhung sawizui a hlawh thei dawn a ni, a ti.