New York City-ah billionaire an tam ber

Khawvel huap pawha khawpui ropui leh lar a ni a, New York City hi US mai ni lo, khawvel puma sumdawnna hmunpui leh lian a ni. Hei vang hian he khua hi mi hausahoin an bawh nasa a, mi hausa satliah ni lo, mi hausa tawntaw pawh khawvel ram hrang hrang khawpui zingah a ngah ber.

New York i tih ringawt chuan state hming a ni a, an state khawpui chu Albany daih a ni. New York City erawh he state hming put chhan leh New York State-a khawpui lian ber a ni. He khawpui hi khawvel hmun hrang hranga khawpuite zinga billionaire tamna ber khawpui a ni a, billionaire hi mi 82 lai an awm a, heng mite sum neih zawng hi USD tld 397.9 hu a ni. He khawpuia hausa ber chu David Koch a ni a, USD tld 48.3 hu a ni.

Hong Kong khawpui hi hausa tawntaw tamna ber dawttu a ni pha. British awp hunlai aṭang leh, tuna China hnuaia an awm hnu thleng hian he khawpui, mahnia inrelbawlna hranpa deuh reuh nei hi China Sea huam chhunga sumdawnna hmun pawimawh tak a ni reng. Billionaire hi 75 lai an kawl a, heng mite hausakna belhkhawm hi USD 297.8 lai a tling a, an zingah hian Li Ka Shing chuan USD tld 31.2 zet neiin a hausa ber.

Russia khawpui Moscow hi mi hausa tawntaw hoin an bawh khawpui a ni a, billionaire ngah lamah khawpui pathumna a ni. Billionaire 73 an awm a, heng mite sum neih hlut lam hi USD tld 297 zet a ni. Leonid Mikhelson hi Moscow-a hausa ber a ni. Beijing chuan billionaire 54 neiin palinaah a awm a, London-ah billionaire 50 awmin billionaire tamna khawpuiah pangana a ni.

India khawpui Mumbai chu paruknaah a lang pha a, billionaire 41 an awm a, billionaire 40 awmna khawpui Shanghai chu pasarihna a ni. Seoul-ah billionaire 37 an awm a, China khawpui lian pakhat Shenzhen-ah billionaire 35 an awm a, San Francisco-ah billionaire 32 an awm. Top 20-a lang chinah billionaire tamna khawpui, Asia pawn lama mi chu 16-naah Sao Paulo, Brazil; 17-naah Los Angeles, USA; 18-naah Paris, France te an ni.