Shakira School a hawn belh

Colombian zaithiam, midangte châwikân leh ṭanpuina lama mi inpe tak Shakira chuan a chhuahna khua, Barranquilla-ah school dang a hawn belh leh.

Shakira hian Colombia hmun hrang hrangah school hi a hawng tawh a, Colombia mipui, rethei leh thingtlang mite an lo changkan a, hma an sawn theihna turin hma a la nasa. Infrastructure te, kawngpui ṭha leh tui thianghlim in tur nei lote hmunah hma a la nasa a, sorkarin a ngaihsak phak loh thingtlang leh hmun kilkhawrah te hma lain, naupangten zirna ṭha an neih phak lohna hmunah zirna ṭha an neih theih nan school a hawng.

Shakira chuan, “Globalized khawvelah kan cheng tawh a, khawvelin hma a sawn a, a lo hausak theihna tur chuan naupangte aṭangin bul kan ṭan a ṭul. Retheihna tihbona tura thil ṭha ber chu naupangte ṭanpui hi a ni,” a ti. Kum 40 mi Shakira hian kum 1997 khan Pies Descalzos Foundation dinin, he pawl kaltlang hian Colombia hmun hrang hrangah hna a thawk a, tuna school a hawn pawh hi school pasarih a hawnna a ni.