'Nukawki Pasal, Keimah Zabilha ṭawngṭai damthei' tlangzarh a hnai!

Mizo film hit tak mai 'Dengi I Love You' siamtute kut chhuak tho film thar 'Nukawki Pasal, Keimah Zabilha ṭawngṭai damthei' chu July 1, 2022 zan dar 7:30-ah Saikuti Hall, Lunglei-ah tlangzarh a ni dawn.

'Nukawki Pasal, Keimah Zabilha ṭawngṭai damthei' hi tlangzarh a nih rualin Lersia Play apps lamah a en theih nghal dawn bawk a ni.

2021 Mizo Film Award best actress Rosangpuii Ralte leh best supporting actor K Vanlalawmpuia-te chu a changtu ber an ni dawn a, B.Lalbiakvela chu director a ni ang.

Audio mastering leh background score (sound) chu EFX Audio Mathana kut chhuak a ni dawn a, Lailen consulting-te chu co producer tur an ni.

He film script ziaktu leh director ni bawk B.Lalbiakvela chuan,"Covid 19 laia chhungkaw pakhat thawnthu baka Mizo culture, sakhua leh politics tarlanna tur film a ni," tiin a sawi a, he hian a film hawi lam tur chu a tichiang viau awm e. May thla tir lamah khan OST pawh an lo tichhuak tawh a, comedy a ni dawn tih a chiang bawk a ni.