Lady Gaga chu Harley Quinn?!

Kar hmasa lawk khan Joker chhunzawmna siam a ni dawn tih director Todd Phillips chuan a puangzar chiang tawh a, Joker fan-te'n an nghahhlelhzia an sawina chilper pawh a la hul hmain thu thar hriat tur a awm leh ta.

Zaithiam Lady Gaga chu 'Joker: Folie à Deux'-a Joker-a âtso puitur Harley Quinn lema chang turin an be mek! Ni e, i chhiar dik e, Harley Quinn lemah Lady Gaga a chang thut mai thei. He thu hi nimin lamah khan khawthlang media-te chuan an tuipui khawp mai.

Chumai a la ni lo, Joker 2 hi musical a ni mai thei te an la ti ta deuh deuh a, hei erawh a dik a nih chuan Todd Phillips hian thutlukna huaisen tak a siam a ni ang. Mahse heng zawng zawngah hian thu chiang tak hriat tur a la awm loa, thil ni thut thei erawh a nih ngei hmel.

June 7 khan director Todd Phillips chuan Instagram lamah 'Joker: Folie à Deux' script kâwm a tarlan bakah Joaquin Phoenix-a'n script a chhiar lai thlalak a tarlang tel a, chuvang chuan Joaquin Phoenix pawh a inlan leh ngei dawn niin a lang. Inremna erawh an la siam chiah lo niin 'Variety' chuan a tarlang a ni.