'Jurassic World: Dominion' a hrâm bengchheng

'Jurassic World: Dominion' chu Zirtawpni liam ta khan US-ah tlangzarh a ni ta a, Box Office-ah ro rel nghalin $145,075,625 tehmeuh sum a lalut nghal.

He film hi kar tawp liam ta chhung khan theatre 4,676-ah chhuah a ni a, US pawnah $247,414,000 lalut bawkin a sum hmuh chhuah tawh zawng zawng chu $392,489,625 a tling tawh hial. Kumina film tlangzarh zinga sum lalut tam pariatna a ni nghal a, sum a thawk chhuak ṭha nghal hle.

Chris Pratt, Bryce Dallas Howard, Laura Dern, Jeff Goldblum, Sam Neill leh DeWanda Wise-te channa film hi kum 2018-a tlangzarh 'Jurassic World: Fallen Kingdom' chhunzawmna niin Jurassic Park franchise film parukna a ni tawh. Sum thawk chhuak tam angreng viau mah se critics lam mit erawh a tlung viau loa, screenplay leh runtime an sawisel nasa angreng viau. Rotten Tomatoes lamah phei chuan review-tu lamin an dim tehchiam lo a niang, mi 314-in an review aṭangin ratings 4.9/10 chiah a hmu!

'Top Gun: Maverick' a la thlawk sang reng
Kumina film tlangzarh zinga sum lalut tam pathumna ni der tawh 'Top Gun: Maverick' chuan kar tawp liam ta chhung khan theatre 4,262 aṭangin $51,855,344 lai sum a lalut leh. US-ah ringawt he film hian kar thum chhung lekin $395,199,280 a lalut tawh a, ram dang aṭanga a sum lakluh zawng zawng nena belhkhawm phei chuan $748,899,280 lai sum a lalut tawh a ni.

Dr. Strange 2-in $tld a hnaih zel
Doctor Strange in the Multiverse of Madness chu pathumna niin $5,215,065 a lalut tawh a, a sum lakluh tawh zawng zawng zat chu $930,537,923 a ni hem tawh mai. Kum 2022-a film hlawhtling ber ni mek hian $tluklehdingawn a lakluh tlin thuai a rinawm.

Film thar dang pathum
Box Office Mojo chart-ah 'Jurassic World: Dominion' ni lo film thar dang pathum a la awm. 10-na A'nte Sundharaniki' chu film thar a ni a, 29-na 'Lost Illusions' leh 33-na 'Mad God' chu film thar a ni bawk.

Box Office top 10:-
1 Jurassic World: Dominion $145,075,625
2 Top Gun: Maverick $51,855,344
3 Doctor Strange in the Multiverse of Madness $5,215,065
4 The Bad Guys $2,533,380
5 The Bob's Burgers Movie $2,466,496
6 Downton Abbey: A New Era $1,757,605
7 Everything Everywhere All at Once $1,306,056
8 Firestarter $833,340
9 Sonic the Hedgehog 2 $750,559
10 Ante Sundharaniki $620,000