Bethsy 'Isua nen chauh' khum theitu la awm lo

Ṭhazual Fakna chart-ah chart hmasaa pakhatna Bethsy Lalrinsangi 'Isua nen chauh' tho pakhatna a ni leh a, Hmingtea Chhangte 'Hun duhawm' chu pahnihna niin Seraphic Choir 'Hnehna Lallukhum' chu pathumna a ni bawk.

Tunhnaiah a zawna chart No.1 ni nawn thei an awm tam lo viau, mahse Bethsy Lalrinsangi erawh chu a hla thar 'Isua nen chauh' hmangin chart topper a rawn ni nawn tlat.

Hetiang din­hmuna ding thei hi Bethsy a ni miau a, a mak hran lo e. A hla thar nalh tak R. Lalchhanhima (Chhantea) phuah hi March thlaa a tihchhuah kha a ni a, thla li pawh a ral hmain chart-ah No.1 a nihnawn pui thei der tawh.

Music video-ah hian Rody Vanlal­hriatpuii kan hmu bawk nen, a hmuhnawm piah lamah Bethsy zai a ngaihnawm bawk a, YouTube lamah pawh thlira ngaithlatu nuai 8.5 a nei der tawh, thlan hlawh ber a ni pawh hi a awm hle a, tunhnaia Pathian fakna hla ngaihthlak hlawh ber a ni tih pawh a chiang.

Hmingtea Chhangte chuan a hla 'Hun duhawm' chu hma a sawnpui zel a, chart-ah No.2 a nihpui tawh. Chart hmasaah khan palina a ni a, tunah erawh pahnihnaah a rawn inhlangkai tawh a, No.1 a ni thei dawn em tih erawh hriat a chakawm tawh hle.

Ṭhazual chart No.1 pawh lo ni tawh Seraphic Choir 'Hnehna Lallukhum' chu pathumnaah a rawn inhlangkai bawk. Anni pawh hi chart hmasaah khan pangana an ni a, tunah erawh top 3-ah an rawn inhlangkai ta a, an dinhmun an sawh nghet sawt hle a ni.

Pensy pawhin a hla thar 'Ka tan Kraws-ah ngei chuan' chu hma a sawnpui zel a, palina a nihpui der tawh. Lalthlengliani Jongte chuan 'A hming fak la' hmangin top 5 a khar thung a ni.

Ṭhazual chart Top 10:-

1    Bethsy Lalrinsangi     -    Isua nen chuan

2    Hmingtea Chhangte     -    Hun duhawm

3    Seraphic Choir     -    Hnehna Lallukhum

4    Pensy     -    Ka tan Kraws-ah ngei chuan

5    Lalthlengliani Jongte     -    A hming fak la

6    Mapuii     -    Zirtirtu ṭha

7    Lalbiaktluanga (Btea)     -    Fak tlak I ni

8    Mawitea    -    Chibai ka buk che

9    One In Christ    -    Hriselna

10    Maruati & Rla    -    A hnai reng Isua