Fashion fiesta

Incheina khawvelah hian hmeichhiate hi kan duai lo hle. Mipa hnaa kan ngaih tam tak pawh hi kan kutzala a tlak meuh chuan ṭha tak hian kan ti thei ve mai zel a, Zoramah pawh nu/ hmeichhia fakawm leh ropui tak tak ka hmu ṭhin, ka hmu fo, chung zinga ka sawi hmaih phal loh chu designer Mahlui hi niin, ani ngei mai hian kar kalta Zirtawp zan khan Show hmuhnawm tak min hlui leh a, mit leh beng a tlai hle. Ama’n rim taka a din leh a buaipui, Pearl School of Fashion Designing-ah hian zirlai 16 ten collection hmuhnawm tak tak min entir a, a hatu model an nalhin an zei bawk a, show a tiropui zual khawp mai; ka sawi hmaih phal loh Mizo Dance Camp lama kan lam thiamte an dance sequence a va hmuhnawmin an va thiam em! Lawmi Khiangte, Sangkimi leh Zorinzuali ten zaiin min awi a, an zaithiam chu thuhran, Mahlui design an inbel a, an nalh hlawm hle, hemi zan na na na chu.

Incheina khawvelah hian hmeichhiate hi kan duai lo hle. Mipa hnaa kan ngaih tam tak pawh hi kan kutzala a tlak meuh chuan ṭha tak hian kan ti thei ve mai zel a, Zoramah pawh nu/ hmeichhia fakawm leh ropui tak tak ka hmu ṭhin, ka hmu fo, chung zinga ka sawi hmaih phal loh chu designer Mahlui hi niin, ani ngei mai hian kar kalta Zirtawp zan khan Show hmuhnawm tak min hlui leh a, mit leh beng a tlai hle. Ama’n rim taka a din leh a buaipui, Pearl School of Fashion Designing-ah hian zirlai 16 ten collection hmuhnawm tak tak min entir a, a hatu model an nalhin an zei bawk a, show a tiropui zual khawp mai; ka sawi hmaih phal loh Mizo Dance Camp lama kan lam thiamte an dance sequence a va hmuhnawmin an va thiam em! Lawmi Khiangte, Sangkimi leh Zorinzuali ten zaiin min awi a, an zaithiam chu thuhran, Mahlui design an inbel a, an nalh hlawm hle, hemi zan na na na chu.

Kawnpui nula hawiher zâng vah mai Lalmuan­chhani collection-in hma rawn hruaiin, he collection hi ka duh em emna pakhat chu thawhrimna ka hmu a ni. Design uchuak awm lo mah se Sapin layering an tih leh texture lamah a sang hle a, a senduk leh var lam rawng niin thawmhnaw 5 (panga) collection khatah kan hmu a ni. Hells Fury theme hmangin Lalfaktluangi, Bungkawn chuan a collection te bikers lam atanga la in, model te leather leh suede, sequins a chei tlet te nen an rawn inbel a, an incheina ti mawi zual turin helmet chei dangdai tak te leh knee guard te nen, zipper leh studs lam ten ro a rawn rel a ni deuh ber.

Lalbiaknungi, Mualcheng collection-in rawn zuiin, a theme - Geometric Elegance ti lang chiang zual turin geometric shapes leh pattern te kan hmu leh a, black silver leh metallic lam rawn hmangin, model te an inlan leh a. Glam up tih theme R. Lalbiaksangmawii collection erawh kum zabi 20-na chhoa hip hop culture-in a collection a inspired hneh hle; gold, yellow, black leh green lam hawia kalin accessories leh print lamah abstract te kan hmu. Mary Lalruatfeli, Thenzawl nula erawh chuan 90s chhoa rockstar te inchei dan zul a rawn zui a, animal print lam pawh kan hmu nasa; fur leh guitar nen lama rawn inbelin kekawr tlangarh nen lam 90s hunlaia concert-a kal awm ang mai kan ni; mit a tlai hle. Fleurotic theme hmangin Lalnunmawii, Bethlehem chuan a collection, pangpar zulzuia a duan chu a senlar leh var rawngte hmangin pangpar siamchawp leh beadswork te kan hmu leh a, a thawmhnaw ho hi a nu tlangpui a ni. Insectomology a theme hming put chhan zulzuiin Lalramhluni, Tuithiang chuan phengphehlep leh rannung dangte
aṭangin idea a rawn siamchhuak a, leather, net, fringe leh ar hmul dye chawp bakah paint te kan hmu nual a ni. Lalrinpuii, Armed Veng South lam erawh mihringa ze hnih yin and yang zulzuiin thil dum leh varte a rawn hmang kawp a, semi formal lam vek a ni e.

Mizo hnam ziarang chhawmnung zelin Zosangpuii Pachuau, Dam Veng chuan Mizo hnam puan nena pawlhin thawmhnaw a rawn duang chhuak a, a sen, dum leh var te hmangin mipa model-in waistcoat nalh tak a rawn ha chhuak bawk a ni. Ar hmul leh hnampuan inchawih mawi tak tak kan thlir ho. Khawthlang ramah kan zuk zin ve ta emaw tih mai turin Ride West theme designer Lalrinhlui, Chanmari, Sangkimi nau ngei mai chuan boots, fringe, uai leh pawnfen chhing tei te hmangin cowboy style lam min rawn hawi pui ta daih a. Ṭum danga kan hmuh zen zen loh, sportswear lam ve thung hi Sihphir nula C.Vanlalhuntharin rawn pho chhuakin, tunlai fitness lam ngaina tana gym kalpui theih tura mawi leh nalh te a ni hlawm. Boho lam ve thung aw; Lalchhandami, Khatla South erawh off white lam rawng rawn hmangin puan ziarang neite nena chawhpawlhin, a Red Indian raih mai a, an sandal mawi tak te leh accesories changtlung tak te avangin ka collection duh ber pawl a ni nghe nghe.

Vaivakawn nula thawkrim tak mai leh idea nei ṭha tak H. Lalawmpuii Victorian Revival zet chu a cut leh thu chu thuhran, a hautak a ni tih a hriatin, a theme mil takin hmanlai lal te inthuam dan zulzui si, tunlai taka a rawn her rem kha awards a lak phahna pakhat niin ka hria. Lalhriatpuii Hnamte, ITI lam ve thung ka collection duh ber te zinga mi niin, lo inbel ve chak deuh deuh pawh ka nei reng a, a main-ah a var hmangin Native American te inchei dan ṭhin zulzuiin thil uai sung sung, thing aṭanga siam beads leh headgear te bakah strappy sandal siamchawp ngat te chuan a collection a chawi hle a ni. Mo kawr erawh kan kalsan thei lo a nih dawn hi; Saiha lam Jubilee Nohro chuan bridal shower hmangin mo kawr a rawn chhawp chhuak a. Bawihbawihi rawn inbel ngei mai kha a mawiin, mo kawr pakhat pawh ṭhui a har tehlul nen, panga lai a rawn phochhuak a, a fakawm hle. A tawp khar nan Glamstruck theme hmangin rawng chi hrang hrang leh quilting leh ṭhui thlur te kan hmu a, leather ze neia cheh te leh net te, velvet leh suede te kekawrbul chhing tei te nen collection danglam tak kan thlir bawk a, mit a tlai hle. Show tiropui lehzualtu leh a hmuna kal te rilru hmunkhat min puttirtu LILZo ngei mai kha, boruak a sosangin mipui te kan mit chauh lo pawh a titlai hle.
Awards pali zinga a ṭhui thiam ber latu Best Garment Collection latu hi Lalbiaknungi niin, Best Collection hi H. Lalawmpuii’n a la a, Best Student erawh Lalnunmawiin a la thung a, Viewers Choice Awards hi Lalhriatpui Hnamte chuan a hum haw thung. Heng bakah hian main sponsor Lakme Absolute, beauty partner Amway te, Israel Digiprint te bakah Hlua Style & Go zirlai chhuak tawh ten model te nalh taka rawn cheiin show hlawhtling takin an buatsaih a, Mizoram Fashion Industry-in hma kan sawn zel e.

Tluangpuii Hmar
Instructress
Vakiria Institute of Fashion Technology