One Direction Member tin hausakna £mtd 50 hu

Kum 25 leh a hnuai lam vek an la ni a, mimal tina an sum neih hlutzawng erawh £mtd 50 vel zet a tling der tawh. One Direction member tinte hi tun anga an kal chhoh zel chuan an la hausa viau dawn.

Zayn Malik-a’n an band chhuahsan tawh mah se, an sum neih zat chhutah hian amah hi an la telh. Zayn Malik-a’n a chhuahsan hnuah One Direction member dang­te chuan hun eng emaw chhung atan band ang chuan music an chawlh­san. Hemi hnu lawk hian Harry Styles, Liam Payne, Louis Tomlinson, Niall Horan leh Zayn Malik te hian an company, 1D Media-a an share 10% an hralh a, a man zat hi £ 70,131,909 (mtd 70) zet a ni a, mimal tinin £ 14,026,381 ṭheuh chang ang an ni.

Hei bakah hian mimal tin hian solo record deals lian tham tak tak an nei hlawm. Music pâwn lamah Harry Styles leh Tomlinson te an kal tel a, film leh television lamah an hlawhtling chho mek. Hetiangte a nih avang hian an hausa sawt hle.

Harry Styles (23)
Hausakna £ mtd 56
Hmathlir Kumin chhunga Sony hnuaia zaithiam lian ber a ni hial awm e. A album tur pawh maktaduai chuang hralh theih beisei a ni. Hei bakah hian Hollywood film Dunkirk-ah a chang mek a, he film-ah hian Tom Hardy pawh a chang
Neih hlut thil Los Angeles-ah £ mtd 4 man in a nei a, London-a a in pawh £ mtd 5.5 man vel a ni. Car a nei nual a, chung zingah chuan Ferrari £ 155,000 man hi a langsar a, Porsche 911 te, Jaguar E Type, Mercedes Benz leh Range Rover te a nei. Art gallery a neiha thil awm hi £ nuai 3 man vel a ni

Liam Payne (23)
Hausakna £ mtd 54
Hmathlir Cheryl Cole nena an inngaihzawnna hian nasa takin sumdawnna lamah a pui a, cheng mtd chuang fe hai luh phah thei tura ngaih a ni a, naute an neih hian a hmalam hun a tieng lehzual; Cheryl Cole hi kum 33 mi a ni. Capitol Records-ah cheng nuai chuang hu record deal a nei bawk
Neih hlut thil Surrey-a a in hi £ mtd 5.1 hu a ni a, Los Angeles-a mi phei chu £ mtd 7 vel lai a tling. Lambhorghini car a nei a, £ 260,000 man vel a ni

Zayn Malik (24)
Hausakna £ mtd 51
Hmathlir Gigi Hadid nena an inngaihzawnna hian sum lakluh lamah nasa takin a pui, Pillowtalk single avang khan sum tam tak a lalut tawh a, a la lakluh belh zel dawn
Neih hlut thil Los Angeles leh Hertfordshire-a a inte hi £ mtd 8.6 hu lai a ni. A car neih hi Bentley Continental a ni a, £ 120,000 man a ni
Nial Horan (23)
Hausakna £ mtd 51
Hmathlir Aman music a phuahin a sa nghal a, chu chuan nakin zelah royalty pawh amah vek a hui theih phah dawn. Nikum September thla khan cheng nuai chuang zet record deal a nei thei
Neih hlut thil Los Angeles-ah £ mtd 3.4 hu in a nei a, London-a a apartment hi £ mtd 6 hu a ni. Ama khua, Ireland-a Mullingar-ah in a nei bawk. Range Rover car, sing 7 man a nei a, Ferrari £ sing kaw man vel a nei bawk

Louis Tomlinson (25)
Hausakna £ mtd50
Hmathlir Nikum December thla khan a solo single hmasa ber ‘Just Hold On’ chu a tichhuak a, he hla hralhna aṭang hian sum eng emaw zat hmuh belh tur a la ni. Fashion campaign lamah an hmang nasa chho viau bawk
Neih hlut thil Tunhnai lawk khan Hollywood Hills-ah £ mtd 6 man in a lei a, North London-ah £ mtd 5 man hu in a lei bawk. A car, Porsche Boxster chu eBay aṭangin a hralh a, Range Rover leh Aston Martin car te a la nei tho.

One Direction
Kum 2010-a X Factor intihsiakah khan Niall Horan, Malik, Liam Payne, Harry Styles leh Tomlinson te hi solo angin Boys category-ah an inlan a, mahse an beisei ang a ni lo. Simon Cowell chuan group angin a siam a, Group category-ah an qualify a, hemi kum X Factor-ah hian pathumna hial an thleng thei a, chu mai bakah khawvela boy band hlawhtling ber an tling ta hial a ni