Emma Thompson “Hollywood-in chêr a duh”

Actress Emma Thompson-i’n a lungawi lohna a sawi chhuak a, chu chu Hollywood-in hmeichhe chêr a duh thu a ni. Hei vang hian amah pawhin a film chan lai a chan loh phah ṭêp tawh.

Kum 57 mi actress hian Sweden-a Skavlan show-ah Hollywood chungchang hi a sawi chhuak. Hollywood hian hmeichhiate chu an movie siam atan chêr reng se, an rihna hloh se a duh a ni a ti. Ama chanchin sawiin, ‘Brideshead kan chan laiin kan chanpui hmeichhe pakhat chu film siamtuten chêr a, a rihna hloh ṭhen tura an nawr avangin ka chan lai ka tawpsan daih ṭêp a ni,” a ti.

British actress hian Hollywood chauh ni loin Britain-ah pawh actress-te chêr tura duhna hi a awm tho a ti a, hetiang a nih avangin actress tam tak chuan an taksa mamawh zat ang ngei ngei pawh an ei ngam lo niin a sawi.

Khawvel huap pawha hlawhtling ni mah se, lemchan thiam tam tak anga Los Angeles-a pêm thlak a duh lo. “Los Angeles kan thlen chiah hi chuan kan thau belh lehzual ta ni maiin ka inhria a, chuvang chuan Los Angeles-a thau anga inngai chunga awm ai chuan Britain-a thlamuang taka awm hi ka duh zawk,” a ti. Film industry ang bawkin French fashion industry te a sawisel a, model chêr ringawt an melh niin a sawi.