In Vogue Ṭhazual Lengzem chart thar berah Michelle Varte bawk pakhatnaah a awm leh a, Ṭhazual zingah a Ṭha zual ber.
Michelle Varte hi ‘Sakhmelṭhachuang’ la hmang bawkin pakhatnaah hian a awm leh a, tun hi a zawna vawi hnih pakhatna a luahna a ni. Michelle hian ‘Sakhmelṭhachuang’ tih hla hi version hnihin a siam a, TV-a a dah loh zawk hi acoustic version, ngaihthlak hahdam tak a ni. Amah an kawmnaah hetianga version hnih a siamna chhan hi huap kim zawk a duh vang tih a sawi.
Michelle Varte tan liau liau he hla hi John Mawitea leh Mapuii Fanai ten an phuah a ni. Michelle hian Mizo love song ṭha pangngai tak a la nei lo a, a story line-ah pawh duhzawng a nei a, chumi tur chuan an phuah a ni. Hmachhawp a ngah hle a, amaherawhchu tun thla hian New Zealand lama let leh rih phawt a tum avangin a hmachhawpte bawhzuina hun a nei rih lo. August thla vel hian Mizoramah a rawn kir leh ang a, chumi hnu lamah chuan a hmachhawpte hi a bawhzui ang. Sap hla siam a tum a, Hindi rap nena pawlh tura a ruahman a ni.
Aziri’n a rawn kâng chak a, parukna aṭangin pahnihna a rawn thleng dawrh mai; a hmanhmawh hle. A hmaa pahnihna luahtu Mercy Remsangmuani chu pahnihnaaṭangin panganaah a tla thla ta thung. Aziri hla ‘Eng vangin nge nge?’ tih hi pakhatna a luah thei ang em? Mercy Remsangmuani pawh pakhatna a luah mai rin tawh laiin pahnihna aia sang a thleng dawn ta lo a nih hmel.
Feli Fanai hla ‘Theih chang se’ tih chu pathumnaah bawk a awm leh a, Grace-i hla ‘No khat’ pawh palinaah a la ding. Top 10-ah hian lang thar pahnih an awm a, Tetea hla ‘Duhaisam tikimtu’ leh Thiamchantira hla ‘Palai tir ang aw’ tih te a chhuak. Lang tharte hi pasarihnaah Marshall FK ft Ruatfeli ‘Fahrah nun’ leh Pantei hla ‘Tawnmang’ tihte a ni.
In Vogue Ṭhazual Lengzem
1 Michelle Varte -
Sakhmelṭhachuang
2 Aziri - Engvangin nge
3 Feli Fanai - Theih chang se
4 Grace - No khat
5 Mercy Remsangmuani -
Hmangaihtu ngaiin an ṭap e
6 Caseys Secret - Duhaisam
7 Marshall FK ft Ruatfeli-
Fahrah nun
8 Mathlenga - Zawlkhaw Dingdi
9 Kimkima - Ka zei an ti ṭhin
10 Pantei - Tawnmang