Bob Dylan-a’n Nobel Prize a dawng ve ta

Nikum December-a Nobel Prize an sem khan Bob Dylan hi a inlan lo a, a dawng ve lo. Nobel Prize in Literature dawngtu tura puan Bob Dylan hian chawimawina hi a dawng dawn nge dawn lo tih an inhnial luih luih hnuah, tun Inrinni khan a dawng ve hram e.

Swedish Academy chuan nikum October khan Nobel Prize in Literature dawngtu tur a ni tih an puang a, December-a chawimawina hlanna inkhawm­ah khan a tel lo. A dawng duh tawh dawn lo emaw an tih hnuah tun Inrinni khan he chawimawina hi a dawng ve ta hram. Literature prize hian USD 910,000 a keng tel.

Dylan hian kar tawp khan Stockholm, Sweden khawpuiah concert a nei a, Sweden-ah hian concert neih tur hma bak a la nei a, chumi hnu chuan Germany-ah a chhuk ang.