Car hriat hlawh 'Venue' thar tlangzarh

Aizawl District Transport Officer H Lalhmingliana chuan nimin khan CK Hyundai showroom, Bawngkawnah car thar Venue a tlangzarh.

He car hi Nilaini khan India ram hmun hrang hrangah tlangzarh a ni tawh a, niminah khan Mizoramah tlangzarh a ni ve ta a ni.

Lalhmingliana chuan kum 10 chhung Santro car a neih tawh avangin Hyundai chu company rin tlak a ni tih a sawi a, ama milpui zelah company dang nena khaikhinin car ṭha ber a nih thu a sawi.

Aizawl DTO hian Mizoram Transport Department-in lirthei khalh chhuah theih dan a neihte zawm ṭhat a pawimawh a, hemi kawngah hian Mizorama automobile dealer zingah CK Hyundai chu an fakawm hle tih a sawi bawk.

Venue hmasa kha kum 2019-a tihchhuah niin India rama 'car of the year' a ni zui nghal a, CK Hyundai pawhin car an zawrh zingah chuan tun kum thum chhunga an hralh hnem ber a nih thu leh 1200 vel an hralh thu an sawi.

Venue thar chungchang sawitu Lalbiakdika chuan 'a hmaa mi nen a engine danglam lo mah se a hmel, a hnung leh a hma lam, ke a danglam' tih a sawi bakah, tunlai thiamna ṭha leh changkang tam tak bilh tel a nih thu a sawi.

Dealer Principal Joseph Lalchhanhima chuan Mizo mipuiin Venue an duh avangin an pe daih lo hle a, hauh lawk mi 70 vel an awm reng tih sawiin, tuna a thar hi tlangzarh a nih hmain mi 57-in an hauh lawk thu a sawi a ni.

HYUNDAI VENUE

A THAR MAN

1.2 ltr petrol : Rs 7,53,100

1.5 ltr diesel : Rs 9,99,900

1.0 ltr turbo : Rs 9,99,900