Internet Explorer, R.I.P

Microsoft chuan an web browser Internet Explorer an titawp ta tih an puang.

Hun eng emaw lai kha chuan Internet Explorer hi web browser rirawl ber ani ṭhin a, mahse Nilaini khan kum 27 lai hnuah an titawp ta a ni.

Tunah chuan tech giant Microsoft hian Internet Explorer hi update leh fix an siam tawh dawn loa, chu ai chuan a thlakna Microsoft Edge lam kawhhmuh zel an ni tawh ang.

Internet Explorer hi kum 1995 khan Windows desktop computer-a hman theih tura chhawp chhuah a ni a, kum 2004 velah phei kha chuan market-a 95% vel lai chu an hauh hial. Mahse tunah chuan Google Chrome, Apple Safari leh Mozilla Firefox-te ho hun a rawn inher chhuak tawh a, Explorer lam hawi kan awm meuh tawh lo.

Nikuma Internet Explorer 11 an tihchhuah khan Microsoft lam chuan a version tawp ber a nih dawn thu an lo sawi tawh a ni.