The Undertaker Wrestling khawvel a chawlhsan ta

Pathianni khan Florida-a Orlando-ah WrestleMania a awm a, hetah hian Roman Reigns nen inhmachhawnin The Undertaker a chak lo. A chak loh hnu lawkah The Undertaker chuan WWE wrestling khawvel aṭanga a chawlh thu a puang. WWE hnuaiah hian kum 26 chhung a awm hman.

WrestleMania zawhah hian The Undertaker chuan a kutkawr leh kawrchung fual leh a lukhum a phelh a, ring-ah a hnutchhiah; hei hi wrestler ten an chawl tawh dawn tih an lantirna a ni. Hemi hnu hian The Undertaker hian a chawlh thu hi a puang ta a ni. A chawlh thu a puan chhuah hnu hian wrestling khawvela mi langsar tak takten amah an uina leh chawimawina thu an sawi hlawm.

Mick Foley chuan “The Undertaker, ka lawm e. Nangmah ka hriat aṭang hian ka nun hi nasa takin a ṭhat phah a ni,” a ti. Ric Flair chuan, “Ka Man Taker, WWE chanchina star ropui ber a ni...a style ṭhin ang­in a kal chhuak ta. Nangmah nena khaikhin chuan keini hi chu kan nep hle a ni,” a ti.

Wrestling khawvela hriat hlawh, The Undertaker, a hming tak Mark William Calaway hi Houston, Texas-ah March 24, 1965 khan a piang a,World Class Championship Wrestling (WCCW)-ah aṭangin kum 1984 khan bul a ṭan a, chumi hnuah World Championship Wrestling (WCW)-ah lutin, World Wrestling Federation-ah, WWE tih a nih hnu thlengin a awm zui ta a ni.

Kum 1984 aṭangin wrestling khawvelah a lut ṭan

WWF/WWE Championship hi vawi li a la tawh a, WWE World Heavyweight Championship pawh ṭum thum a la tawh

Wrestling-a a luh tirha a hming chu Texas Red a ni a, a hnuah The Master of Pain, The Punisher tih hmingte a lo pu tawh

Finishing move a neih zingah Chokeslam, triangle choke, tombstone Piledriver te a lar hle

Ft 6 leh inchi 10-a sang a ni a, kg 140-a rit a ni

Basket ball a thiam hle a, boxing a ngaina hle, golf pawh hi a khelh nasat pawl a ni